वीरगंज । पर्सा जिल्लाको वीरगंज महानगरपालिका क्षेत्रमा पछिल्ला दिनहरूमा देखिएको चरम खानेपानी अभावको समस्यालाई लिएर नेपाल सरकारका खानेपानी मन्त्री प्रदीप यादवले स्थानीय सचेत र सक्रिय नगरवासीको सहयोग र समन्वयबिना समाधान असम्भव रहेको बताएका छन् ।
मन्त्री यादवका अनुसार संघीय सरकारले वीरगंज महानगरपालिकासँग सहकार्य गरी डिप बोरिङको जडान, पाइपलाइन चुहावट नियन्त्रण, तथा धारा जडान प्रक्रियालाई सहज बनाउन आवश्यक जनशक्ति र स्रोत परिचालन गरिसकेको छ। नेपाल खानेपानी संस्थान वीरगंज शाखा हाल दैनिक ८० लाख लिटर पानी उत्पादन र वितरण गरिरहेको भए पनि केही क्षेत्रहरूमा अझै समस्या देखिएको छ।
यसैबिच, संस्थानले गरेको अनुगमनमा स्पर्ष हस्पिटल र शुभलाभ पेट्रोल पम्पको पछाडिको गली क्षेत्रमा भल्भ राति बन्द गरी पाइपमा अवैध रूपमा मोटर जडान गरिएको तथा पाइप फुटाइएका घटनाहरू पत्ता लागेको जनाएको छ । यस्ता कार्यले कृत्रिम अभाव सिर्जना गरिनुका साथै संस्थानको प्रयासलाई बदनाम गराउने षड्यन्त्र भएको आशंका गरिएको छ ।
संस्थानले सबै नगरवासीलाई अपिल गर्दै यस्ता अवैध क्रियाकलापबारे जानकारी पाएमा तुरुन्तै संस्थानलाई सूचित गर्न आग्रह गरेको छ। मन्त्री यादवले पनि यस अभियानलाई सफल बनाउन नागरिक सहभागिता अपरिहार्य रहेको उल्लेख गर्दै सबैको साझा उद्देश्य स्वच्छ, सुरक्षित र पर्याप्त खानेपानी सुनिश्चित गर्नु हो भन्ने धारणा व्यक्त गरेका छन् ।
