वीरगंज । खानेपानी संकटले सताइरहेको बेला वीरगंज महानगरपालिकाका विभिन्न वडा कार्यालयहरूबाट सिफारिसका नाममा मनपरी शुल्क असुली भइरहेको गुनासो सेवाग्राहीहरूले गरेका छन्।
खानेपानी संस्थानको लाइन लिन आवश्यक पर्ने सिफारिस बनाउँदा वडाहरूले रु १,५०० देखि रु ३,००० सम्म लिने गरेको सेवाग्राहीहरूले वताएका छन् । अझ चिन्ताजनक त के भने, कतिपय वडाले शुल्क लिएर पनि रसिद नदिने गरेका छन् ।
स्थानीय जय साहका अनुसार, “खानेपानीको लाइन जडानका लागि संस्थानलाई मात्र रु ६,३०० तिर्नुपर्ने छ, त्यसबाहेक पाइप, ट्याप लगायतका सामानमा १५–२० हजार खर्च हुन्छ। यस्तो अवस्थामा वडाले सिफारिसमा थप २–३ हजार लिँदा गरिबका लागि झन् ठूलो बोझ बन्छ।”
उनी भन्छन्, “धनीले त २०–३० हजार खर्च गर्न सक्छन्, तर विपन्न परिवारका लागि यो रकम भारी हुन्छ। सिफारिस निःशुल्क हुनुपर्छ भन्ने हाम्रो माग हो।”
यस बिषयमा बुझ्न वीरगंज ११ का वडाध्यक्ष अजय चाैरसियालाई फाेनमा सम्पर्क गर्दा फाेन नउठेका कारण सम्पर्क हुन सकेन ।
यता, नागरिकहरूले प्रश्न उठाएका छन् कि खानेपानी संस्थानलाई शुल्क तिरेर सेवा लिँदा वडाले सिफारिसको नाममा अतिरिक्त शुल्क किन लिन्छ? विपद र संकटकाे बेला महानगर तथा वडाले झन सहयाेग गर्नु पर्ने उल्टै अवै असुली गर्नु अनुचित भएकाे अर्का स्थानिय राधेश्याम पटेलकाे भनाई छ ।
खानेपानी अभावले त्राहिमाम वीरगंजवासी खानेपानी सेवाकाे लागि अझ झन्झटिलो प्रक्रिया र आर्थिक भारका कारण पीडित भइरहेका छन् । सेवा सहज उपलब्ध गराउन नगर कै खानेपानी मन्त्री प्रदिप यादवकाे तर्फबाट पहल आवश्यक रहेकाे स्थानियले वताएका छन् ।
साथै यस्तो अवस्थामा महानगरपालिकाले वडास्तरीय सिफारिसलाई निशुल्क बनाउने तथा प्रक्रिया सहज बनाउनेतर्फ ध्यान दिनु पनि आवश्यक हरेकाे देखिन्छ।
