वीरगंज । वीरगंजमा लामो समयदेखि चल्दै आएको पानी अभाव अहिले चरम अवस्थामा पुगेको छ । भू–जलको सतह घट्दै जाँदा अधिकांश चापाकलहरू सुक्न थालेका छन्, जसले दैनिक उपभोगका लागि पानी जुटाउन पनि नागरिकलाई मुस्किल पारेको छ । यस्तो संकटका बेला वीरगंज महानगरपालिका तत्काल राहतसहित बस्ती–बस्तीमा पुग्न थालेको छ ।
महानगर प्रमुख राजेशमान सिंह स्वयम् मंगलबार राति वडा नं. ११ अन्तर्गत विद्यापति नगर, श्रीपुर, रानीघाट लगायतका प्रभावित क्षेत्रमा ट्यांकी र ट्यांकरसहित पुगेका हुन । उनले भने, “जहाँ समस्या छ, त्यहाँ समाधान लैजान्छौं । वीरगंजवासीलाई पानीको अभावमा राखिन्न ।”
महानगरले हाल १० हजार, ५ हजार र २ हजार लिटर क्षमताका पानी ट्यांकीहरू संकटग्रस्त स्थानहरूमा राखेर आपूर्ति सुरु गरिसकेको छ । पानी भर्न र वितरण गर्न ५ वटा ट्यांकर र ३ वटा दमकल चौबिसै घण्टा परिचालित छन् । प्रत्येक वडामा स्थानीय प्रतिनिधि, कर्मचारी तथा स्वयंसेवकहरूको संयोजनमा तालिकाबद्ध रूपमा पानी वितरण गरिँदैछ ।
यससँगै, महानगरले दीर्घकालीन समाधानका उपायहरू पनि अघि सारेको छ । भू–जल पुनर्भरण, वर्षा पानी संकलन, सार्वजनिक भण्डारण ट्यांकी निर्माण तथा वैकल्पिक जल स्रोतको पहिचानका लागि योजनाहरू प्रारम्भ भइसकेका छन् ।
“तत्काल राहत मात्र होइन, दीर्घकालीन समाधानका खाका तयार पार्दैछौं,” मेयर सिंहले बताए ।
