वीरगंज । सर्लाहीको बागमती नगरपालिका–१२ स्थित चेकपोस्टमा प्रहरीले ठूलो मात्रामा काजु तस्करीको प्रयास विफल पारेको छ । परालको भुसभित्र लुकाएर ल्याइँदै गरिएको ८२० किलो काजु आइतबार बिहान प्रहरीले बरामद गरेको हो ।
ईलाका प्रहरी कार्यालय कर्मैयाबाट प्रहरी नायब निरीक्षक (सई) सुभाष यादवको नेतृत्वमा खटिएको टोलीले विशेष सूचनाका आधारमा मदनपुरबाट काठमाडौंतर्फ गइरहेको ग २ ख १४१८ नम्बरको मिनी ट्रक चेकजाँच गर्दा काजु फेला पारेको हो ।
प्रहरीका अनुसार २८ वटा प्लास्टिकको बोरामा राखिएका ८२ वटा बाल्टिनभित्र १०/१० किलोका दरले काजु लुकाइएको थियो । बरामद काजुको बजार मूल्य करिब १२ लाख ३० हजार रुपैयाँ रहेको छ भने तस्करीमा प्रयोग भएको ट्रकको मूल्य २५ लाख रुपैयाँ अनुमान गरिएको छ।
कुल ३७ लाख ३० हजार रुपैयाँ बराबरको सामानसहित बरहथवा नगरपालिका–१३ बसबरीया निवासी ५६ वर्षीय ट्रक चालक राजबंशी झालाई प्रहरीले नियन्त्रणमा लिएको छ । ट्रक, काजु र चालकलाई इलाका प्रहरी कार्यालय कर्मैयामा राखिएको छ भने कागजी प्रक्रिया पूरा गरी सर्लाही भन्सार कार्यालय मलंगवामा बुझाउने तयारी भइरहेको प्रहरीले जनाएको छ ।
घटनापछि स्थानीयवासीले प्रहरीको सक्रियता र निगरानीको प्रशंसा गर्दै तस्करी नियन्त्रणमा देखिएको तत्परतालाई सकारात्मक कदमका रूपमा लिएका छन् ।
