वीरगंज । जनता समाजवादी पार्टी (जसपा)का मधेस प्रदेश अध्यक्ष अशोक यादवविरुद्ध जिल्ला अदालत सर्लाहीले पक्राउ पुर्जी जारी गरेको छ । जिल्ला प्रहरी प्रमुख एसपी योगेन्द्रकुमार खड्कालाई टेलिफोनमार्फत ‘लुटेरा’ भनेको आरोपमा यादवमाथि ‘आपराधिक उपद्रव’ अन्तर्गत मुद्दा दर्ता गरिएको हो ।
गृह मन्त्रालयको निर्देशनअनुसार अदालतबाट पक्राउ पुर्जी जारी गरिएको हो । घटनाको सुरुआत यादवले सर्लाहीका एक व्यापारीलाई प्रहरीले दु:ख दिएको भन्दै एसपी खड्कासँग टेलिफोन संवाद गरेका थिए । उक्त अडियो सार्वजनिक भएपछि घटनाले थप राजनीतिक र कानुनी विवाद सिर्जना गरेको छ ।
नेपाल प्रहरीका केन्द्रीय प्रवक्ता डिआइजी विनोद घिमिरेले यस विषयमा मधेस प्रदेश प्रहरी कार्यालयलाई आवश्यक कानुनी कारबाही अघि बढाउन निर्देशन दिएको जानकारी दिए । त्यस्तै, मधेस प्रदेश प्रहरी कार्यालयका डिआइजी उमाप्रसाद चतुर्वेदीले घटनाबारे गम्भीर अध्ययन भइरहेको र कानुनी प्रक्रिया अगाडि बढाइएको बताएका छन् ।
यता अध्यक्ष यादवले भने आफूले सत्यतथ्य बोलेको र घटनामा आफ्नो असहमति रहेको जनाउँदै आवश्यक पर्दा प्रमाणसहित जवाफ दिन तयार रहेको बताएका छन् ।
यो घटनाले राजनीतिक दलका नेताहरू र सुरक्षाप्रशासनबीचको सम्बन्धमाथि पुनः बहस सुरु गराएको छ ।
