वीरगंज । संघीय सरकारको खानेपानी मन्त्रालयले वीरगंज महानगरपालिकालाई कार्यालय प्रयोजनका लागि दुई थान पिकअप गाडी प्रदान गरेको छ । जापनिज कम्पनी टोयोटाका दुई पिकअप गाडी मन्त्री प्रदीप यादवको पहलमा महानगरलाई हस्तान्तरण गरिएको हो ।
केही दिनअघि काठमाडौंस्थित मन्त्रालयमा आयोजित कार्यक्रममा खानेपानी मन्त्री प्रदीप यादवले वीरगंज महानगरपालिकाका मेयर राजेशमान सिंह र प्रमुख प्रशासकीय अधिकृत अरविन्दलाल कर्णलाई ती गाडीका कागजात हस्तान्तरण गरेका थिए । त्यसपछि दुवै गाडी वीरगंज ल्याइएको हो ।
शुक्रबार वीरगंज महानगर कार्यालयको प्रांगणमा मेयर सिंहले हिन्दू परम्परा अनुसार विधिपूर्वक पूजापाठ गरी ती गाडीहरू सेवा प्रयोजनमा प्रयोगमा ल्याउने घोषणा गरेका छन् ।
उनका प्रेस सल्लाहकार नवराज फुयाँलका अनुसार गाडीहरू अब महानगरको दैनिक प्रशासनिक तथा विकास गतिविधिमा प्रयोग गरिनेछ । यस सहयोगबाट वीरगंज महानगरपालिकाको सेवा प्रवाहमा थप सहजता आउने अपेक्षा गरिएको छ ।
