वीरगंज । वीरगंज महानगरपालिका क्षेत्रभित्र हिन्दू धर्मावलम्बीहरूको धार्मिक आस्था र सांस्कृतिक पहिचानमाथि सम्भावित हस्तक्षेपप्रति भइरहेकाे भन्दै विश्व हिन्दू परिषद्ले गम्भीर आपत्ति जनाउँदै चेतावनी दिएको छ।
परिषद्ले जिल्ला प्रशासन कार्यालय, पर्सामा बुझाएको ज्ञापनपत्रमार्फत हिन्दू समाजको आस्था र परम्परा विपरीतका गतिविधि रोक्न आग्रह गर्दै हिन्दू समुदायमाथि अपमानजनक व्यवहार हुन नदिन माग गरेको छ। विशेषगरी आदर्शनगर क्षेत्रमा ‘जय श्रीराम’ लेखिएको झण्डा हटाइएको घटनाप्रति विश्व हिन्दू परिषद् नेपालले कडा आपत्ति जनाएको छ।
उक्त कार्यलाई हिन्दू धर्म, आस्था र सांस्कृतिक पहिचानमाथिको गम्भीर हस्तक्षेप भन्दै परिषदले तत्काल सार्वजनिक क्षमायाचनाको माग गरेको छ ।
ज्ञापन पत्रमा धार्मिक आस्था, रीतिरिवाज र सांस्कृतिक परम्परामाथि भएको हस्तक्षेप लोकतान्त्रिक मूल्य र संविधानको विपरीत भएकाे उल्लेख गर्दै परिषदले हिन्दू समुदायमाथि अपमानजनक र विभेदपूर्ण व्यवहार गरिएको खण्डमा कडा प्रतिकार गरिने चेतावनी दिइएको छ ।
यस सन्दर्भमा प्रशासन र सुरक्ष निकायले स्पष्ट नीति, सेवा प्रवाह र समावेशीता अपनाउनु पर्ने परिषदले पर्साका प्रमुख जिल्ला अधिकारी गणेश अर्याललाई बुझाएकाे ज्ञापन पत्रमा उल्लेख छ । जिल्ला सचिव विक्की मिश्राले हस्ताक्षर गरेकाे ज्ञापन पत्र मार्फत परिषद्ले हिन्दू समुदायको धार्मिक स्वतन्त्रता र सामाजिक सम्मान सुनिश्चित गर्न स्थानीय प्रशासन, जनप्रतिनिधि र सबै सरोकारवालाहरूसँग तत्काल आवश्यक कदम चाल्न पनि आग्रह गरेको छ ।
