वीरगंज । इलाका प्रहरी कार्यालय काेल्हवी बाराले मोटरसाइकल चोरीमा संलग्न रहेको अभियोगमा ३ जनालाई पक्राउ गरेको छ भने उनीहरूको साथबाट चोरी गरिएको ५ ओटा मोटरसाइकल समेत बरामद गरेको छ ।
विभिन्न मिति, समय र स्थानहरूबाट हराएका वा चोरी भएका मोटरसाइकलहरू फेला पार्न इलाका प्रहरी कार्यालय कोल्हवीमा निवेदन तथा जाहेरी दरखास्त प्राप्त भएपछि, प्रहरी निरीक्षक रंजन मिश्रको कमाण्डमा खटिएको टोलीले खोजतलासका क्रममा चोरीमा संलग्न ३ जनालाई पक्राउ गरेको हो ।
पक्राउ परेका व्यक्तिहरुमा बारा जिल्लाको कोल्हबी नगरपालिका–१ बस्ने २१ वर्षीय राहुल बिक, २३ वर्षीय अर्जुन खवास र २३ वर्षीय मुस्कान चौधरी रहेका छन् । पक्राउ परेकाहरूमाथि बारा जिल्ला अदालतबाट म्याद थप गरी थप अनुसन्धान भइरहेको प्रहरीले जनाएको छ ।
बरामद भएका मोटरसाइकलहरू यस प्रकार छन्:
१. प्र.२-०३-००६ प ६५१५ – Honda Shine, १२५ सिसी
२. ना.४८ प ६९७० – TVS RTR 200, कालो रङ
३. बा.९४ प २१४६ – Bajaj Pulsar 220, निलो रङ
४. ना.६५ प ८८६० – TVS Striker, रातो-कालो रङ
५. प्र.२-०३-००५ प ६२२६ – TVS Striker, निलो रङ
प्रहरीका अनुसार मोटरसाइकल चोरीको घटनामा संलग्न अन्य सम्भावित व्यक्तिहरुको खोजी पनि जारी रहेको छ। जिल्ला प्रहरी कार्यालय बाराले नागरिकहरुलाई आफ्ना सवारी साधनमा आवश्यक सुरक्षा उपाय अपनाउन आग्रह समेत गरेको छ।
