वीरगंज । वीरगंज महानगरपालिकाकाे वडा नं. २४ स्थित विश्वनाथ राउतको घरबाट पोषण पूरक औषधी (फुड सप्लिमेन्ट) कालोबजारीमा संलग्न एक व्यक्ति पक्राउ परेका छन् ।
वीरगंज–२६ निवासी ४२ वर्षीय जितेन्द्र प्रसाद कुर्मीलाई विभिन्न ब्रान्डका ठूलो परिमाणमा औषधीसहित नियन्त्रणमा लिएको जिल्ला प्रहरी कार्यालय पर्साका प्रवक्ता प्रहरी नायब उपरिक्षक किशाेर लम्सालले जानकारी दिए ।
भारतबाट कम मूल्यमा आयात गरी औषधीहरूमा आफुखुसी पाँच गुणासम्म बढी मूल्य प्रिन्ट गरी विक्री वितरण गर्ने गरेको सूचनाका आधारमा जिल्ला प्रहरी कार्यालय पर्साबाट खटिएको टोलीले सोमबार साँझ १६:४५ बजे उक्त व्यक्ति पक्राउ गरेको प्रवक्ता लम्सालले वताए ।
उनका अनुसार पक्राउ परेका कुर्मीले खाली एमआरपी भएका औषधीहरूमा आफैंले तयार पारेको ५ गुणा बढी मूल्य छापेर बिक्री वितरण गरिरहेका थिए ।
बरामद सामग्रीहरू यस प्रकार छन्
-
ACON2K, CANWEL POWDER, ORTHOHEAL, NITVIT PLUS, SIMROSE, IMMATEK EAL SUSPENSION, ACTIFERON, PREGAFOL, ARTHRAID, VITO-C, LIVUS, EVELTN, IMMUHEAL लगायतका ब्राण्डका हजारौं पिस औषधीहरू
-
MRP छाप्ने मेसिन, बिल तथा अर्डर बुकहरू, नेपाल न्यूट्रास्युटिकल्स कम्पनी प्रा.लि. लेखिएको ठेली
प्रहरीका अनुसार नियन्त्रणमा लिइएका औषधीहरूको आकंलित मूल्य लगभग २५ लाख रुपैयाँ बराबर रहेको छ। घटनासम्बन्धी थप अनुसन्धान जारी रहेको र कालोबजारी ऐन अन्तर्गत कानुनी कारवाही प्रक्रिया अघि बढाइएको प्रहरीले जनाएको छ।
