वीरगंज । पर्साको भेडियाही–१५ मा अवस्थित नेशनल मेडिकल कलेज, वीरगंज र पर्सा जिल्लाभरिका २२ वटा सहकारी संस्थाबीच स्वास्थ्य सेवा सम्झौता सम्पन्न भएको छ।
आइतबार नेशनल मेडिकल कलेजको सभाहलमा आयोजित कार्यक्रममा प्रबन्ध निर्देशक शहनवाज अन्सारी र सहकारी प्रतिनिधिहरूबीच सम्झौतापत्रमा हस्ताक्षर गरिएको हो। कार्यक्रममा कलेजका अध्यक्ष प्रो.डा. जैनुदिन अन्सारीको अध्यक्षता रहेको थियो।
सम्झौताअनुसार सहकारी सदस्य तथा कर्मचारीहरूले कलेजमार्फत विभिन्न २० प्रकारका स्वास्थ्य सेवामा विशेष छुट पाउनेछन्।
क वर्ग अन्तर्गत सहकारी सदस्यहरूले ओपिडी टिकटमा २५%, जनरल बेड चार्जमा १५%, आइसियु/पियसियुमा ५%, लाप्रोस्कोपिक सेवामा ८%, पयाथोलोजीमा १०%, भिडियो एक्सरे/एमआरआईमा ७%, फार्मेसीमा १०–१५% छुट पाउनेछन्।
त्यस्तै, ख वर्ग अन्तर्गत सहकारी कर्मचारी र संचालकहरूलाई ओपिडी टिकटमा ५०%, जनरल बेडमा २०%, आइसियुमा ५%, अन्य सेवामा १०–१५% छुट दिइनेछ।
सम्झौता एक वर्षका लागि लागू हुनेछ भने आवश्यक परे दुवै पक्षको सहमतिमा परिमार्जन गर्न सकिने प्रबन्ध निर्देशक अन्सारीले बताए।
वीरगंज महानगरपालिका क्षेत्रका अधिकांश सहकारीहरूको उपस्थिति रहेको उक्त कार्यक्रममा सहकारी प्रतिनिधिहरूले गरीब र असहायलाई सुलभ स्वास्थ्य सेवा उपलब्ध हुने भन्दै यो सम्झौताका दिनलाई ऐतिहासिक बताएका छन्।
अस्पतालकी निर्देशक डा. ईसरत जहान अन्सारीले सहरीदेखि ग्रामीण क्षेत्रसम्मका नागरिकलाई सहज उपचार सेवा मिल्ने विश्वास व्यक्त गरिन्। कार्यक्रममा मार्केटिङ तथा एडमिसन डाइरेक्टर आबिद हुसेन अन्सारी, को-अपरेटिभ म्यानेजर्स क्लबका अध्यक्ष रविभूषण श्रीवास्तवलगायत कार्यसमिति सदस्यहरूको उपस्थिति थियो।
