वीरगंज । पर्साकाे जगरनाथपुर गाउँपालिकाले २२औं राष्ट्रिय धान दिवस विशेष उत्साहका साथ मनाएको छ । गाउँपालिकाको वडा नं. ४ स्थित सुहपुर सोहरिमा आयोजना गरिएको विशेष कार्यक्रममार्फत यो दिवस भव्य रूपमा सम्पन्न गरिएको हो ।
गाउँपालिका अध्यक्ष श्रीकान्त यादवको अध्यक्षतामा सम्पन्न कार्यक्रममा प्रमुख प्रशासकीय अधिकृत सन्देश कुमार यादव, उपाध्यक्ष बबिता सिंह क्षेत्री, वडा नं. ४ का अध्यक्ष नेपाली प्रसाद कुशवाहा, कृषि अधिकृत दयानन्द चौहान, वडा सदस्यहरू, पालिकाका कर्मचारी, स्थानीय किसान तथा सर्वसाधारणको उल्लेखनीय उपस्थिति रहेको थियो ।
अध्यक्ष यादवले कार्यक्रममा बोल्दै धानलाई नेपाली जनजीवनको अभिन्न हिस्सा तथा देशको संस्कृति र समृद्धिको मूल आधारको रूपमा व्याख्या गरे। उनले कृषिमा आत्मनिर्भरता हासिल गर्नका लागि गाउँपालिकाले किसानहरूसँग सहकार्य गर्दै आएको जानकारी दिँदै, आगामी दिनहरूमा तालिम, प्रविधि र अनुदान कार्यक्रमहरू अझ प्रभावकारी बनाइने प्रतिबद्धता व्यक्त गरे।
कार्यक्रममा उत्कृष्ट किसानहरूको सम्मान गरिएको थियो भने, धान उत्पादन प्रवर्द्धन र आधुनिक कृषि प्रविधिको प्रयोगबारे छलफलहरू पनि गरियो । प्रतीकात्मक धान रोपाइँ कार्यक्रमले कार्यक्रममा रमाइलोपन थपेको थियो ।
स्थानीय जनसमुदायको सक्रिय सहभागिताले कृषिको महत्वप्रति जनचेतना फैलाउने मात्र नभई, यसले उत्पादनमा समेत सकारात्मक प्रभाव पार्ने विश्वास आयोजकको रहेको छ ।
