वीरगञ्ज । नेपाल प्रेस युनियन पर्साले आयोजना गरेको पत्रकार सम्मेलनमा नेपाली कांग्रेसका केन्द्रीय सदस्य तथा शिक्षा विभाग प्रमुख नैनसिंह महरले हालको सत्ता गठबन्धनले जनतामा कुनै पनि उत्साहपूर्ण काम गर्न नसकेको आरोप लगाएका छन्। उनले कांग्रेस र एमालेबीचको ७ बुँदे सहमतिमा बनेको सरकार एमालेको हालीमुहालीमा सीमित भएको र कांग्रेस निरीहजस्तै बनेको टिप्पणी गरे।
महरले नेपाली कांग्रेस आफैं जनतामाझ बदनाम बन्दै गएको र यसले पार्टीलाई कमजोर बनाइरहेको बताए। अहिलेको नेतृत्वले पार्टीको १५औँ महाधिवेशन समयमै सम्पन्न गर्न आवश्यक तयारी नगरेको उल्लेख गर्दै उनले देशभरका नेता–कार्यकर्ताबाट दबाब सिर्जना गर्नुपर्ने आवश्यकता औंल्याए।
फरक प्रसंगमा उनले संघीय सरकारले ल्याएको आगामी आर्थिक वर्षको बजेटमा मधेस प्रदेशप्रति पुनः विभेद भएको आरोप पनि लगाए। “देशलाई सबैभन्दा बढी राजस्व र रेमिट्यान्स दिने प्रदेश मधेस हो, तर संघीय बजेटले फेरि पनि यसप्रति विभेद देखाएको छ,” महरले भने।
उनले सरकारमा रहेका दलहरूले चरित्रवान र इमान्दार नेतृत्व प्रस्तुत गर्न नसके जनताको हितमा काम सम्भव नहुने बताउँदै सबै दलमा शुद्धिकरण अभियान आवश्यक रहेको धारणा राखे। शुद्धिकरणको थालनी कांग्रेसभित्रैबाट हुनुपर्ने उनले बताए।
महरले केन्द्र, प्रदेश र स्थानीय तहको बजेटलाई ‘ब्रहमलुट’ को मानसिकताले तयार पारिएको भन्दै आलोचना गरे। साथै, देशमै रोजगारी सिर्जना गरेर युवाको विदेश पलायन रोक्न र विदेशिएका युवालाई फर्काउने वातावरण बनाउन सरकारसँग मागसमेत गरे।
कार्यक्रम प्रेस युनियन पर्साका अध्यक्ष विजय चौहानको अध्यक्षतामा सम्पन्न भएको थियो। कार्यक्रममा वीरगञ्ज महानगरपालिका उपप्रमुख इम्तियाज आलम, कांग्रेसका पूर्व क्षेत्रीय सभापति विजय सर्राफ, प्रेस युनियनका केन्द्रीय सदस्य श्रीराम रायमाझीलगायतको उपस्थिति रहेको जानकारी उपप्रमुखका प्रेस सल्लाहकार महमद सदाबले दिए।
