वीरगंज । पर्सा प्रहरीले वीरगञ्जबाट एक ट्रक चालकलाई ३१९ केजी चरेससहित पक्राउ गरेको छ । पक्राउ पर्नेमा मकवानपुरको थाहा नगरपालिका–१२ निवासी ३६ वर्षीय बुद्धिबहादुर स्याङ्तान रहेका छन् ।
जिल्ला प्रहरी कार्यालय पर्साका अनुसार यो परिमाणको चरेस बरामद हुनु सम्भवतः पहिलोपटक हो । स्याङ्तानबाट प्रहरीले १ लाख ९२ हजार नगद रुपैयाँ समेत बरामद गरेको छ ।
बुधवार बेलुकी बाराको परवानीपुरबाट वीरगञ्जस्थित सिर्सिया सुख्खा बन्दरगाह (ड्राइपोर्ट)तर्फ गइरहेको प्रदेश २–०३–००१ ख ६३४८ नम्बरको ट्रकलाई प्रहरीले परवानीपुर चोकमा रोक्ने क्रममा चेकजाँच गरिएको थियो । ट्रकको मालबाहक भागमा प्लास्टिक बोरामा पोका बनाएर राखिएको अवस्थामा लागूऔषध चरेस फेला परेको हो ।
पक्राउ परेका चालक स्याङ्तानले धादिङबाट चरेस लोड गरी भारत पठाउने योजनासहित वीरगञ्ज ल्याएको प्रहरी समक्ष स्वीकार गरेका छन् । उनलाई हिरासतमा राखी पर्सा जिल्ला अदालतबाट पाँच दिनको म्याद थप गरी अनुसन्धान अगाडि बढाइएको जिल्ला प्रहरी कार्यालय पर्साका प्रमुख एसपी गौतम मिश्रले जानकारी दिए ।
पत्रकार सम्मेलनमा एसपी मिश्रले पर्सामा लागूऔषध तस्करीको चेन ब्रेक गर्न व्यापक प्रयास भइरहेको जनाउँदै यस कडीमा अहिलेसम्मकै ठूलो परिमाणको चरेस बरामद भएको बताए । उनका अनुसार चरेसको बजार मूल्य झण्डै १ करोड रुपैयाँ रहेको अनुमान गरिएको छ ।
प्रहरीले चरेस तस्करीमा संलग्न अन्य व्यक्ति तथा तस्करीको सञ्जालबारे पनि सूक्ष्म अनुसन्धान गरिरहेको जनाएको छ । एसपी मिश्रले भने, “लागूऔषध तस्करीको चेन ब्रेक गर्ने उद्देश्यसहित हामीले अनुसन्धान तीव्र पारिरहेका छौँ ।”
