वीरगंज । नेशनल मेडिकल कलेज वीरगंज र वीरगंज महानगरपालिकाका ७ वटा वडाबीच पुनः स्वास्थ्य सेवा सम्बन्धी महत्वपूर्ण सम्झौता भएको छ। मंगलबार कलेजको सभा हलमा आयोजित कार्यक्रममा वीरगंज महानगरकाे वडा नं. ११, १२, १५, १९, २०, २३ र २४ का वडाध्यक्षहरू तथा कलेजका प्रबन्ध निर्देशक सहनवाज अन्सारीबीच सम्झौतापत्रमा हस्ताक्षर भएकाे हाे ।
सम्झौताअनुसार यी वडाका बासिन्दाले नेशनल मेडिकल कलेजबाट विभिन्न सेवा शुल्कमा छुट पाउनेछन् । सम्झाैता अनुसारओपिडी टिकटमा २५%, जेनरल बेड चार्जमा १५%, आइसियु, एनआइसियु, पीआइसियु बेड चार्जमा ५%, लाप्रोस्कोपिक तथा इन्डोस्कोपिक शल्यक्रियामा ८%, पयाथोलोजी जाँचमा १०%, भिडियो एक्सरे, एक्सरे, ईसीजी, इन्डोस्कोपीमा ७%, सिटी स्क्यान तथा एमआरआईमा ७%, फार्मेसी ओपिडीमा १०%, फार्मेसी आईपिडीमा १५% छुट प्रदान गरिने छ ।
यी छुट सुविधाहरू पाउनका लागि सम्बन्धित वडा कार्यालयको लेटरप्याडमा सिफारिस आवश्यक पर्नेछ। यसबाहेक, कलेजले सम्झौतामा समावेश ७ वटै वडामा प्रत्येक तीन महिनामा एक पटक निःशुल्क स्वास्थ्य शिविर तथा रक्तदान कार्यक्रम आयोजना गर्ने प्रतिबद्धता जनाएको छ।
सम्झौता एक वर्षका लागि लागू हुनेछ र आवश्यक परेमा आपसी सहमतिमा परिमार्जन गर्न सकिने अस्पतालका प्रबन्ध निर्देशक सहनवाज अन्सारीले जानकारी दिए।
यसअघि पहिलो चरणमा १३ वडासँग स्वास्थ्य सम्झौता भइसकेको थियो भने, अहिले दोस्रो चरणमा थप ७ वडासँग सम्झौता सम्पन्न भएको हो।
कार्यक्रममा वडा नं. ११ का वडाध्यक्ष अजय कुमार बरै, १२ का सुरेश कुमार गुप्ता, १५ का रमेश प्रसाद यादव, १९ का मुकेश कुमार चौरसिया, २० का रामकिशोर सिंह, २३ का अवधकिशोर कुशवाहा र २४ का विजय प्रसाद कुर्मीको उपस्थिति रहेको थियो।
वडाध्यक्षहरूले यो सम्झौताले गरिब, असहाय र विपन्न वर्गका लागि गुणस्तरीय उपचारमा सहज पहुँच पुर्याउने विश्वास व्यक्त गरे।
अस्पतालकी निर्देशक डा. ईसरत जहान अन्सारीले बाँकी रहेका वडासँग पनि छिट्टै सम्झौता गरिने जनाउँदै, “अब शहरदेखि गाउँसम्म सबै जनताले स्वास्थ्य सेवा सहज रूपमा पाउनेछन्,” भनिन्।
समारोहमा अस्पतालका मार्केटिङ तथा एडमिसन डाइरेक्टर आबिद हुसेन, एकाडेमी डाइरेक्टर रुबी श्रेष्ठ यास्मिन, सञ्चारकर्मी तथा विभिन्न सरोकारवालाहरूको पनि उपस्थिति थियो।
