वीरगंज । वीरगञ्ज — ११ औं अन्तर्राष्ट्रिय योग दिवसको अवसरमा भारतीय महावाणिज्य दूतावास, वीरगञ्जले शनिबार बिहान शंकराचार्य गेटमा भव्य योग कार्यक्रमको आयोजना गर्यो। कार्यक्रममा मधेश प्रदेशका मुख्यमन्त्री सतिशकुमार सिंह प्रमुख अतिथिको रूपमा सहभागी भए।
साताव्यापी कार्यक्रमअन्तर्गतको समापन समारोहमा सयौंको संख्यामा सहभागीहरू उपस्थित थिए । योग प्रशिक्षकहरूको नेतृत्वमा सामूहिक योग अभ्यास गरिँदै, स्वास्थ्य सचेतना अभिवृद्धिका लागि जनसमुदायलाई प्रेरित गरिएको थियो।
मुख्यमन्त्री सिंहले योगलाई “सबै रोगको अचुक औषधि” भन्दै दैनिक जीवनशैलीमा योगको समावेश आवश्यक रहेको बताए। उनले भने, “योग स्वास्थ्यको सुरक्षाकवच हो, जसले शारीरिक र मानसिक सन्तुलन कायम गर्छ।”
भारतीय महावाणिज्यदूत देवी सहाय मिनाले कार्यक्रमका सहभागीहरूप्रति स्वागत व्यक्त गर्दै योगको ऐतिहासिक पृष्ठभूमि र अन्तर्राष्ट्रिय महत्त्वबारे प्रकाश पारे। उनले “एक पृथ्वी, एक स्वास्थ्य” भन्ने नाराले मानव र प्रकृतिको समन्वयलाई जोड दिएको बताए।
कार्यक्रममा मधेश प्रदेशका खेलकुद तथा समाज कल्याण मन्त्री प्रमोदकुमार जयसवाल, प्रमुख जिल्ला अधिकारी गणेश अर्याल, प्रहरी उपरीक्षक गौतम मिश्र, सुरक्षा निकायका प्रमुख, पतञ्जली योग समिति, नेपाल-भारत मैत्री संघलगायत विभिन्न संघसंस्थाका प्रतिनिधिहरूको उल्लेखनीय उपस्थिति थियो।
कार्यक्रमको सञ्चालन भारतीय महावाणिज्य दूतावासका राजनीतिक कन्सुल संजयकुमारले गरेका थिए । सहभागीहरूले “वसुधैव कुटुम्बकम्” को भावनाले निर्देशित योग अभियानले नेपाल-भारत सम्बन्ध थप प्रगाढ बनाएको र समाजमा योगप्रतिको चेतना बढाएको धारणा व्यक्त गरेका थिए।
