जनकपुर । बृहत्तर जनकपुर क्षेत्र विकास परिषद्का तत्कालीन कार्यकारी निर्देशक बलराम ठाकुरसहित ९ जनाविरुद्ध सार्वजनिक सम्पत्तिमा हानि नोक्सानी, हिनामिना र भ्रष्टाचारको आरोपमा विशेष अदालतमा आरोपपत्र दायर गरिएको छ।
सहायक प्रवक्ता देवी प्रसाद थपलियाद्वारा जारी प्रेस विज्ञप्तिअनुसार, ठाकुरले परिषद्को रकम स्वीकृत प्रक्रिया नअपनाई व्यक्तिगत स्वार्थका लागि खर्च गरेको, साथै स्कर्पियो गाडी खरिद तथा बिक्रीमा समेत ठगी र अनियमितता गरेको अनुसन्धानबाट खुलेको हो।
अनुसन्धानका क्रममा ठाकुरले कार्यकालकाे दौरानमा (२०७५ मंसिर ५ देखि २०७९ मंसिर ४) बा १३ च २०३७ नम्बरको स्कर्पियो गाडी खरिद गरी एक वर्षपछि सो गाडी आफ्नै श्रीमती इन्दुलेखा कुमारी ठाकुरको नाममा नामसारी गराएका थिए।
यसपछि उनले अर्का गाडी धनी मुकेश यादवसँग झुटो सम्झौता देखाई गाडी भाडाको नाममा नक्कली कागजात तयार पारेर यादवको खातामा रु. १० लाख रुपैयाँ सरकारी रकम अनधिकृत रूपमा भुक्तानी गराएको प्रमाण भेटिएको छ।
यो कार्यमा ठाकुरसहित अन्य आठ जना प्रतिवादीको संलग्नता रहेको भन्दै अख्तियार दुरुपयोग अनुसन्धान आयोगले विशेष अदालतमा भ्रष्टाचारको आरोपपत्र दायर गरेको हो।
सार्वजनिक सम्पत्तिको दुरुपयोग र गैरकानुनी लाभ उठाउने कार्यलाई राज्यकोषमाथिको गम्भीर धोखाधडी मान्दै आयोगले कडा कारबाहीको माग गर्दै मुद्दा अघि बढाएको जनाएको छ।
