वीरगंज । मानव बेचबिखन तथा ओसारपसारको आरोपमा पर्साको ठोरीबाट एक जना पुरुष पक्राउ परेका छन् । चितवन माडी नगरपालिका–८, खर्कटा बस्ने ४१ वर्षीय दिपक खड्कालाई भारततर्फ मानिस बेच्न लैजाँदै गरेको आरोपमा नियन्त्रणमा लिइएको हो ।
बुधबार बिहान ११:४५ बजे पर्सा जिल्लाको ठोरी गाउँपालिका–२ ठोरी बजारस्थितबाट सूचना प्राप्त हुनासाथ खटिएको प्रहरी टोलीले मानव बेचबिखनको प्रयासमा संलग्न रहेका खड्कालाई पक्राउ गरेको हो । उक्त घटनामा खड्काले चार जना व्यक्तिहरूलाई “फ्रि टिकट, फ्रि भिसामा दुबई र ओमानमा रोजगारीको प्रलोभन” देखाई भारततर्फ लैजाँदै गरेको खुलासा भएको छ ।
प्रहरीको सक्रियतामा ती चारजनालाई सकुशल उद्दार गरिएको छ । पक्राउ परेका खड्काविरुद्ध मानव बेचबिखन तथा ओसारपसार सम्बन्धी कसुरमा जिल्ला अदालत पर्साबाट पाँच दिनको म्याद थप अनुमति लिई अनुसन्धान अघि बढाइएको पर्सा प्रहरीले जानकारी दिएको छ ।
प्रहरीका अनुसार खड्काले योजनाबद्ध रूपमा बेरोजगार तथा विपन्न व्यक्तिहरूलाई ठगी गर्दै विदेश पठाउने बहानामा भारत हुँदै तस्करी गर्ने प्रयास गरेका थिए । घटनासम्बन्धी थप अनुसन्धान जारी रहेको प्रहरीले जनाएको छ ।
