वीरगंज । पर्साको वीरगन्ज महानगरपालिका वडा नम्बर १६ रजतजयन्ति चोकबाट प्रहरीले १ केजी अफिमसहित चार जनालाई पक्राउ गरेको छ । पक्राउ पर्नेमा पटेर्वासुगौली गाउँपालिका–१ का ४० वर्षीय विनोद गिरी, वडा नम्बर ५ का ३३ वर्षीय प्रदीप चौधरी, २८ वर्षीय सुनीलकुमार श्रीवास्तव र ३४ वर्षीय रामेश्वर राउत रहेका छन् ।
वडा प्रहरी कार्यालय विर्ता र लागुऔषध नियन्त्रण ब्यूरो शाखा कार्यालय पर्साबाट खटिएको संयुक्त टोलीले वीरगन्जबाट रक्सौलतर्फ जाँदै गरेका दुईवटा मोटरसाइकल—ना.४६ प २५४० र ना.४० प ६४६९—लाई रजतजयन्ति चोकमा रोकेर चेकजाँच गर्दा ना.४० प ६४६९ नम्बरको मोटरसाइकलमा सवार रामेश्वर र विनोदको साथमा रहेको प्लास्टिकको झोलाबाट १ केजी अफिम फेला परेको थियो ।
प्रहरीका अनुसार, सो कार्यमा संलग्न रहेको पाइएपछि प्रदीप र सुनीललाई समेत पक्राउ गरिएको हो । पर्साका प्रहरी नायब उपरीक्षक किशोर लम्सालका अनुसार, अफिम र मोटरसाइकलसहित पक्राउ परेका चारै जनालाई लागू औषध सम्बन्धी कसूरमा पर्सा जिल्ला अदालतबाट ५ दिनको म्याद थप अनुमति लिएर थप अनुसन्धान भइरहेको छ।
