वीरगंज । नेपाल रेडक्रस सोसाइटी पर्सा शाखाले हाल रक्त अभावका कारण उत्पन्न समस्या समाधानका लागि आम नागरिकहरूलाई रक्तदान गर्न वा गराउन आग्रह गरेको छ।
गर्मीका कारण विभिन्न संघ–संस्थाबाट हुने रक्तदान कार्यक्रमहरूमा कमी आएको भन्दै सोसाइटीले विशेष अपील गर्दै वीरगञ्जस्थित रक्तसंञ्चार सेवा केन्द्रमा आउने थाईसिमिया, एनेमिया, डायलाइसिस उपचाररत बिरामी, सुत्केरी महिला, एचआइभी संक्रमित बिरामीहरूलाई रगतको चरम अभाव भएको उल्लेख गरेको छ।
रेडकसले रक्तदान शिविर सञ्चालन गर्नका लागि विभिन्न सामाजिक संघसंस्था, नागरिक समाज र युवाहरूको सहयोग मागेको छ। साथै, महिला पुरुष सबै रक्तदातालाई वीरगञ्ज स्थित रक्तसंञ्चार केन्द्रमा पुगेर स्वेच्छिक रक्तदान गर्न हार्दिक अनुरोध गरिएको छ।
रेडकस पर्सा शाखाका मन्त्री विनोद गिरिले हस्ताक्षर गरेको अपीलमा भनिएको छ, “रक्तदान जीवनदान हो।”
रक्तदानका लागि इच्छुक व्यक्तिहरूले नेपाल रेडक्रस सोसाइटी, पर्सा जिल्ला शाखा, वीरगञ्जमा सम्पर्क गर्न सक्नेछन्।
