सर्लाही । सर्लाहीको बागमती नगरपालिका–१२ स्थित चेकपोष्टमा प्रहरीले एक ट्रक नियन्त्रणमा लिएको छ, जसमा अवैध तथा बिल-बिजक नभएका सामानहरू भरिएका थिए।
विशेष सूचनाका आधारमा ईलाका प्रहरी कार्यालय कर्मैयाबाट प्र.ना.नि. सुभाष यादवको कमाण्डमा खटिएको प्रहरी टोलीले आइतबार बिहान ६:१५ बजे वीरगञ्जबाट ईटहरीतर्फ जाँदै गरेको बा ५ ख ३०७ नम्बरको ट्रक रोकी चेकजाँच गरेको थियो।
जाँचका क्रममा ट्रकभित्र टायर, आपमा छर्ने औषधि, मोबिल, खाने तेल, रेगुलेटर, मोटर पार्ट्स, छाता, घिउ, किसमिस, इलेक्ट्रोनिक सामान, कस्मेटिकसहितका विभिन्न प्रकारका खुद्रा सामानहरू भेटिएको प्रहरीले जनाएको छ ।
प्रहरीका अनुसार ती सबै सामानहरूमा आवश्यक कागजात, पञ्जीकरणपत्र र बिल-बिजक शंकास्पद पाइएका छन् । अनुमानित रूपमा ती सामानहरूको बजार मूल्य रु ४२ लाख ४० हजार ३४७ बराबर रहेको बताइएको छ।
उक्त ट्रक र सामान हाल ईलाका प्रहरी कार्यालय कर्मैयाको नियन्त्रणमा राखिएको छ र थप अनुसन्धान जारी रहेको प्रहरीले जनाएको छ । नियन्त्रणमा लिइएको स्थान चेकपोष्टबाट करिब ५० मिटर दक्षिणतर्फ पर्दछ ।
