वीरगंज । तराई मधेशमा भईरहेको प्रचण्ड गर्मीका कारण ह्यान्डपम्प, तालतलैया, पोखरी, खोलानाला सुक्न थालेका छन् । जिल्लाका विभिन्न स्थानमा ह्यान्डपम्प सुकेपछि पिउने पानीको अभाव भएको छ । अहिले पशुचौपायालाई पानी खुवाउन समस्या भएको स्थानीयहरुले बताएका छन ।
आगो नियन्त्रणका लागि प्रयोग गरिने दुईवटा दमकललाई खानेपानी संस्थानले पर्याप्त पानी दिन छोडेको छ । ताल, पोखरी सुकेपछि पानी खोज्न समस्या भएको दमकल कर्मचारीले बताए ।
गर्मीले वीरगन्जको गहवा मात्र होइन श्रीपुर, रानीघाट, अशोक वाटिका, प्रगतिनगर, छप्कैया, भेडीयाही, नगवालगायत ठाउँमा पानीको चरम संकट भएको स्थानीय बताउँछन् । गर्मीले पानीको सतह पनि सुक्दै गएकाले ह्यान्डपम्पबाट पानी आउन छाडेको हो ।
वीरगन्ज महानगरपालिका अधिकाश स्थानीयबासी दुई महिनादेखि राति निदाउन पाएका छैनन् । उनीहरुको घरपछाडि २६० फिट गहिरो गाडिएको कलमा पानी आउन छाडेको छ । पानीको चक्करमा रातभरि जाग्राम बस्दा दिउसो काम गर्न नपाएको उनीहरु बताउँछन् ।
वीरगनज २६ का प्रदीप पंडितले कहिलेकाहीँ छेउछाउका सबै घरका कल र मोटर पम्पहरू बन्द भएको बेला मध्यरातमा १२ देखि २ बजेसम्म मोटरले कलबाट पानी तान्छ,” उनले भने, “सौभाग्यले थोरै भए पनि पानी आयो भने आउन्जेल मोटर चलाउँदै बस्नु पर्छ, रातभरि चलाउँदा हजार लिटरको ट्यांकीमा आधी पनि भरिँदैन । पानी आएन भने तनावले नै निद्रा आउँदैन ।”
सामाजिक सञ्जाल फेसबुकमा अहिले यो समस्यालाई उजागर गरेर स्टेटस लेख्नेहरु पनि बढेका छन अहिले सानो बच्चादेखि बुज्रुग महिलाको हातमा बाल्टी, बोतल तथा भाडाहरू लिएर, पिउन र खाना बनाउनका लागि पानी कसको घरमा आएको छ सोध्दै हिँडेका छन ।
केही वर्षदेखि गर्मीयाममा कलहरूमा पानी आउन बन्द हुने तथा इनार र जलाशयहरू सुक्न थालेको छ् । यसपालि संकट चरम अवस्थामा पुगेको उनको भनाइ छ । वीरगन्जका आधाभन्दा धेरै घरधुरीले पानीको समस्या भोगिरहेको उनको अनुमान छ ।
वीरगन्ज महानगरपालिकाको खानेपानी शाखाका अनुसार जमिनमा पानीको स्तर घटेर मोटरले समेत नतान्ने अवस्था भएको कारण शहरी क्षेत्रका स्थानीय समस्यामा छन् । पानी परेपछि मात्र यसको समाधान हुने अवस्था छ । “जमिनमुनि हुने पानीको लेबल बढीमा २८÷२९ फिट हुनुपर्छ । सतहमुनिको पानीको लेबल घटेर अहिले ३१ फिटमा झरिसकेको छ । यसबाट गर्मीले जमिन सुक्यो भनेर बुझ्न सकिन्छ,” ्।
यसअघि, हरेक घरमा कल राखेर पानीको आवश्यक्ता पूर्ति गर्ने चलन बढ्दा खानेपानी संस्थानमार्फत आपूर्ति हुने पानीका ग्राहक कम थिए । पहिले सरकारी धारा जडान नगर्ने ग्राहक पनि अहिले धारा जडानका लागि धाइरहेको खानेपानी संस्थान वीरगन्ज शाखाका एक जना कर्मचारी बताउँछन् । धारा जडानका लागि दैनिक एक दर्जन हाराहारीमा निवेदन आउने उनको भनाइ छ ।
वीरगन्ज महानगरपालिकाले पानीको हाहाकार हटाउन विभिन्न वडाका घरधुरीमा खानेपानीको धारा निःशुल्क जडान गर्ने योजना बनाएको मेयर राजेशमान सिंहले जानकारी दिए । महानगरले खानेपानीको अधिक समस्या रहेका वडामा खानेपानी संस्थानसँग समन्वय गरेर धारा जडान गर्न लागेको उनले बताए ।
