ओमप्रकाश चाैधरी ।
सेढवा, २ असार/पर्साको सखुवाप्रसौनी गाउँपालिका वडा नं. २ स्थित दीपनारायण आदर्श नमुना माध्यमिक विद्यालयमा “विद्यार्थीलाई कामको संसार चिनाउने कार्यक्रम” (School to Work Transition) अन्तर्गत १० दिने अन्तरक्रिया कार्यक्रमको भव्य सुरुआत भएको छ।
ENSSURE परियोजनाको सहयोगमा, HELVETAS नेपालको प्राविधिक साथ तथा सखुवाप्रसौनी गाउँपालिकाको समन्वयमा संचालन गरिएको कार्यक्रम कक्षा ८ देखि १० सम्मका विद्यार्थीहरू लक्षित गरी सञ्चालन गरिएको हो । कार्यक्रमको उद्देश्य विद्यार्थीहरूमा व्यवहारिक ज्ञान, सीप, उद्यमशीलता र रोजगारीको अवसरबारे जानकारी दिनु हो।
कार्यक्रमको उद्घाटन विद्यालय व्यवस्थापन समितिका अध्यक्ष शंकर महतोको अध्यक्षतामा तथा गाउँपालिका अध्यक्ष यसवन्त यादवको प्रमुख आतिथ्यमा सम्पन्न भयो।
उद्घाटन समारोहमा बोल्दै प्रमुख अतिथि यादवले बाल्यकालदेखि नै विद्यार्थीहरूले आफ्ना रुचि, क्षमता र लक्ष्यको पहिचान गरी तदनुरूप सीप र ज्ञानको विकास गर्न आवश्यक रहेको बताए । उनले भने, “यस्ता कार्यक्रमहरूले विद्यार्थीहरूलाई आत्मनिर्भर र सक्षम बनाउने दिशामा महत्त्वपूर्ण योगदान गर्छन्।” साथै, गाउँपालिकाबाट सिपमूलक शिक्षाको विस्तारका लागि निरन्तर सहयोग रहने प्रतिबद्धता व्यक्त गरे।
विशिष्ट अतिथि वडा नं. २ का वडाध्यक्ष चिरञ्जीवी महतो थारुले व्यवहारिक शिक्षामा आधारित सिकाइले विद्यार्थीलाई भविष्यमा सक्षम बनाउने उल्लेख गर्दै यस्ता कार्यक्रमको आवश्यकता औंल्याए।
कार्यक्रममा कृषि विकास बैंकका क्षेत्रीय निर्देशक रामप्रसाद गजुरेलले बैंकिङ, कृषि व्यवसाय र स्वरोजगारका अवसरहरूबारे विद्यार्थीलाई जानकारी गराए।
स्थानीय उद्योगपति चन्द्रकिशोर चौधरी थारुले आफ्नो संघर्षको कथा सुनाउँदै परिश्रम र आत्मबलले सफलता प्राप्त गर्न सकिने प्रेरणादायी सन्देश दिए।
कार्यक्रममा विद्यालय व्यवस्थापन समितिका सदस्य रामकिशोर चौधरी थारु, पुनम देवी, ENSSURE परियोजनाका टेक्निकल कोअर्डिनेटर बलबहादुर पौडेल, तथा वृत्ति विकास परामर्शकर्ता राजेश कुशवाहाले पनि आ-आफ्ना क्षेत्रका अनुभवहरू प्रस्तुत गरे।
विद्यालयका प्रधानाध्यापक शिवनाथ प्रसाद थारुले स्वागत मन्तव्य दिँदै, यस्ता कार्यक्रमले विद्यार्थीहरूलाई मार्गदर्शन, आत्मविश्वास र सकारात्मक सोच विकासमा सघाउने विश्वास व्यक्त गरे।
कार्यक्रमको एक भागस्वरूप “भविष्यमा म जे बन्न चाहन्छु” शीर्षकमा निबन्ध, कविता र चित्रकला प्रतियोगिता समेत आयोजना गरिएको थियो। अन्तरक्रिया सत्रमा विद्यार्थीहरूले रोजगारी, सीप तालिम, र भविष्य योजनाबारे जिज्ञासा राखे।
आयोजक पक्षका अनुसार, यो १० दिने कार्यक्रमले विद्यार्थीहरूलाई व्यवहारिक रूपमा दक्ष बनाउँदै उनीहरूलाई स्वावलम्बी जीवनयात्रातर्फ उन्मुख गराउने अपेक्षा गरिएको छ।
