वीरगंज । अफताब आलमलाई सफाई दिने उच्च अदालत वीरगंज, अस्थायी इजलासका न्यायाधीश खुसीराम थारुमाथि सोमबार इजलासमै मोसो प्रहार भएको छ । धमेन्द्र बासतोला नेतृत्वको नेकपा बहुमतका कार्यकर्ताहरू अदालतभित्रै प्रवेश गरी न्यायाधीश थारुमाथि मोसो प्रहार गरेका हुन् ।
प्रत्यक्षदर्शीहरूका अनुसार उनीहरूले ‘जनताको विरुद्धमा फैसला गर्न पाइँदैन’ भन्दै नाराबाजी गर्दै इजलासमै अवरोध गरेका थिए । घटनापछि अदालत परिसरमा केहीबेर तनावको स्थिति उत्पन्न भएको थियो।
घटनासँग सम्बन्धित तीन जनालाई प्रहरीले तत्काल नियन्त्रणमा लिएको छ । प्रहरी स्रोतका अनुसार पक्राउ परेकाहरूमा गमु महतो, पदमबहादुर मगर, र अभिनाष भनिने किशोर कुम्हाल रहेका छन् ।
गत जेठ १४ गते उच्च अदालत वीरगंजका न्यायाधीश खुसीराम थारु र अर्जुन महर्जनको संयुक्त इजलासले नेपाली कांग्रेसका पूर्वसांसद आफताब आलमलाई सफाइ दिएको थियो। यसअघि जिल्ला अदालत रौतहटले आलमलाई दोषी ठहर गर्दै जन्मकैदको सजाय सुनाएको थियो।
उच्च अदालतको फैसलाले जिल्ला अदालतको निर्णय उल्ट्याउँदै बम विस्फोट र व्यक्ति हत्याका आराेपित आलम निर्दोष रहेको ठहर गरेको थियो, जसले गर्दा विभिन्न राजनीतिक दल र सर्वसाधारणबीच व्यापक असन्तुष्टि चुलिएको थियो।
