वीरगंज । आगामी आर्थिक वर्ष २०८२/८३ को बजेटमा सुनचाँदी व्यवसायसँग सम्बन्धित नयाँ कर नीतिको विरोधमा वीरगंजका व्यवसायीहरु आन्दोलित भएका छन्। सरकारले सुनमा २ प्रतिशत विलासिता कर र हिरामा १३ प्रतिशत मूल्य अभिवृद्धि कर (भ्याट) लगाउने निर्णय गरेपछि देशभरका व्यवसायीहरू आन्दोलित बनेका हुन्।
यसै सन्दर्भमा वीरगंजका सुनचाँदी व्यवसायीहरुले बिहीबार आ–आफ्ना पसल बन्द गर्दै विरोध ¥यालीको आयोजना गरेका थिए। पर्सा सुनचाँदी व्यवसायी संघका अध्यक्ष भुलन साह सोनारको नेतृत्वमा निकालिएको ¥याली जिल्ला प्रशासन कार्यालय पुगेर सम्पन्न भएको थियो।
विरोध ¥यालीपश्चात व्यवसायीहरूले सहायक प्रमुख जिल्ला अधिकारी सुमन कार्कीलाई सात बुँदे ज्ञापनपत्रसहित पसलको चाबी हस्तान्तरण गरेका छन्। कार्यक्रममा पर्सा सुनचाँदी कालीगढ संघको समेत उल्लेखनीय उपस्थिति थियो।
ज्ञापनपत्रमा सुन र गहनामा लगाइएको २ प्रतिशत विलासिता कर खारेज गर्न, हिरा तथा जवाहरात जडित गहनामा लगाइएको १३ प्रतिशत भ्याट फिर्ता लिन, तथा सुनचाँदीको कारोबारलाई प्रोत्साहित गर्न नयाँ ऐन, नियम तथा नीतिहरू निर्माण गर्न माग गरिएको छ। साथै, छिमेकी देश भारतमा झैं नेपालमा पनि सुनमा केवल ६ प्रतिशत भन्सार शुल्क मात्र लगाउनुपर्ने माग व्यवसायीहरुले राखेका छन्।
संघका अध्यक्ष भुलन साह सोनारले भने, “सरकारको नयाँ कर प्रणालीले व्यवसायलाई धरापमा पारेको छ। वीरगंजमा मात्रै ४ सयभन्दा बढी सुनचाँदी पसल रहेका छन् र तीमा आश्रित सयौं व्यवसायी संकटमा परेका छन्।”
व्यवसायीहरूले सरकारको निर्णय तत्काल फिर्ता नभए थप कडा आन्दोलन गर्ने चेतावनीसमेत दिएका छन्।
