वीरगंज । खानेपानी मन्त्री प्रदीप यादवले वीरगंज महानगरपालिकाभित्र सञ्चालन हुने नयाँ खानेपानी आयोजनाहरूको निर्माणका लागि आगामी साउन महिनाभित्रै टेण्डर आह्वान गरिने जानकारी दिएका छन्।
सोमबार खानेपानी मन्त्रालयमा वीरगंजको खानेपानी तथा ढल निकाससम्बन्धी समस्या समाधानका लागि आयोजित छलफल कार्यक्रममा मन्त्री यादवले एसियाली विकास बैंक (एडिबी) को ऋण सहयोगमा सञ्चालन गरिने परियोजनाहरूका लागि प्राविधिक तथा वित्तीय छलफल गरेर टेण्डर प्रक्रियामा प्रवेश गरिने बताए।
उनले खानेपानी मन्त्रालय, वीरगंज महानगरपालिका र अन्य सरोकारवाला निकायहरूको संयुक्त प्रयासले वीरगंजवासीको जीवनस्तरमा सकारात्मक परिवर्तन ल्याउने विश्वास व्यक्त गरे।
मन्त्रालयका अनुसार छलफलको निष्कर्षस्वरूप साउन महिनाभित्रै एडिबीसँगको समन्वयमा आयोजनाका लागि टेण्डर आह्वान गर्ने सहमति भएको हो।
कार्यक्रममा वीरगंज महानगरपालिकाका मेयर राजेशमान सिंह, खानेपानी मन्त्रालयका सचिव प्रमिलादेवी शाक्य बज्राचार्य, सहसचिव मीना श्रेष्ठ, रमाकान्त दुवाडी, खानेपानी तथा ढल व्यवस्थापन विभागका महानिर्देशक रामकुमार श्रेष्ठ, नेपाल खानेपानी संस्थानका महाप्रबन्धक अर्जुनबाबु ढकाल लगायतका अधिकारीहरूको सहभागिता रहेको थियो।
