वीरगंज । गत शनिबार वीरगंज महानगरपालिका– १७ अलौस्थित सडकखण्डमा मोटरसाइकललाई टिपरले ठक्कर दिँदा मोटरसाइकलमा सवार दुवैजनाको मृत्यु भयो ।
मृत्यु हुनेमा वीरगन्ज महानगरपालिका–१६ नगवा निवासी मोटरसाइकलचालक २२ वर्षीय छोटु साह सोनार र पछाडि सवार वीरगन्ज महानगरपालिका–२९ रतनपुर टोल निवासी २९ वर्षीय सुकुरुला अन्सारी थिए ।
प्रहरीका अनुसार अपरान्ह वीरगन्जबाट अलौतर्फ आउँदै गरेको बिआर ०५ एल ८१५९ नम्बरको मोटरसाइकललाई विपरीत दिशाबाट जाँदै गरेको टिपरले ठक्कर दिएको थियो । टिपरको ठक्करबाट सोनारको टाउ र छातीमा चोट लागेको थियो । उनको उपचारको क्रममा निलकण्ठ अस्पतालमा मृत्यु भयो ।
यस्तै, मोटरसाइकल पछाडि सवार वीरगन्ज महानगरपालिका–२९ रतनपुर टोल निवासी २९ वर्षीय शुकुरुला अंसारी घाइते भएका थिए ।
अन्सारीको कमर र दुबै खुट्टामा चोट लागेर घाइते रहेको अवस्थामा उपचारको क्रममा नेसनल मेडिकल कलेज मृत्यु भयो ।
ठक्कर दिने टिपरसहित चालक कलैया उपमहानगरपालिका–१६ निवासी ३२ वर्षीय कृष्णप्रसाद पटेललाई नियन्त्रणमा लिएको छ ।
जिल्ला ट्राफिक प्रहरी कार्यालय पर्साका प्रहरी निरिक्षक लोकराज भटट्ले पर्सामा सवारी दुर्घटनामा परेर मर्नेहरु अधिकांश गरेर मोटरसाईकल चालक र पछाडी सवार भएकाहरु रहेको बताए ।
उनका अनुसार युवा उमेरका मोटरसाईकल चालक अनियन्त्रित गतिमा क्षमता भन्दा बढिका मोटरसाईकल चलाएका कारण दुर्घटनामा पर्ने गरेका छन ।
प्रहरी निरिक्षक भटट्ले विगतको तुलनामा अहिले जिल्लामा भईरहेको नियमित चेकजाँच र कडाईका कारण पनि सवारी दुर्घटनामा केही मात्रामा कमि आएको बताए ।
विगतको तुलनामा सवारी दुर्घटनामा परेर मर्नेहरु घटे
पर्सामा पछिल्लो समयमा सवारी दुर्घटनामा परेर मर्नेहरु घटेका छन । गत आर्थिक बर्ष ०८० /०८१ को तुलनामा जिल्लामा सवारी दुर्घटनामा परेर मर्नेहरु घटेका हुन ।
जिल्ला ट्राफिक प्रहरी कार्यालय पर्साका अनुसार गत आर्थिक बर्ष ०८० /०८१ मा सवारी दुर्घटनामा परेर ५१ जनाको मृत्यु भएको छ ।
जसमा ४३ जना पुरुष ,७ जना महिला र एकजना बालिका रहेका छन । भने चालु आर्थिक ०८१ /०८२ को ११ महिनामा सवारी दुर्घटनामा ३६ जना मरेका छन । चालु आर्थिक ११ महिनामा ३१ जना पुरुष ,३ जना महिला , एक जना बालक र एकजना बालिका रहेका छन ।
जिल्ला ट्राफिक प्रहरी कार्यालय पर्साका प्रहरी निरिक्षक लोकराज भटट्का अनुसार यस्तै आर्थिक बर्ष ०७८ /०७९ मा सवारी दुर्घंटनामा ३८ जनाको मृत्यु भएको छ । जसमा ३० जना पुरुष ,२ जना महिला ,४ जना बालक र २ जना बालिका रहेका छन ।
उनका अनुसार आर्थिक बर्ष ०७९ /०८० मा ३९ जनाको मृत्यु भएको छ । जसमा २९ जना पुरुष , ५ जना महिला र ५ जना बालक रहेका छन ।
