वीरगंज । बाराकाे निजगढ नगरपालिकाका वडा नं. ९ बुद्ध चाैकमा चक्कु प्रहार गरी एक युवककाे हत्या गरिएकाे छ । मंगलबार विहान १८ बर्षिय कालु भनिने रोहित शर्माकाे घाटीमा चक्कु प्रहार गरी हत्या गरिएको हाे ।
मृतक राेहित एक्लै घरमा रहेको बेला उनीसंगै बसेका रौतहट चन्द्रपुर नगरपालिका वडा नं.४ निवासी २९ बर्षिय अरुण कुमार सिंहले उनकाे हत्या गरेकाे प्रहरी अनुसन्धानबाट खुलेकाे छ । प्रहरीले उनलाई पक्राउ समेत गरिसकेकाे छ ।
पक्राउ परेका अरुणले अनुसन्धानको सिलसिलमा अनुसन्धान टोली समक्ष आफुले उक्त घटना घटाएको बयान समेत दिएको प्रहरीले जनाएकाे छ ।
घटना घटाउँदा प्रयोग गरिएका कपडाहरू ( ज्याकेट, पाइन्ट ) निजको चपुरस्थित निजकै घरमा र हत्यामा प्रयोग गरिएका चक्कु तथा मोटर साइकल समेत बरामद भएकाे जिल्ला प्रहरी कार्यालय बाराका प्रवक्ता पहरी नायब उपरिक्षक गाैतम मिश्रले वताए ।
अभियुक्त अरूणलाई चपुरस्थित नजिकै किराना पसलबाट नियन्त्रणमा लिइएको उनले जानकारी दिए । उनका अनुसार निजको हातहरूमा काटिएको आलो घाउहरू तथा रगत समेत रहेको फेला परेकाे छ ।
अभियुक्त अरूणकाे मृतकसँग पहिला देखिनै रिसइवि रहेको थियाे । अरुणकाे राेहीतसंग लागू औषध सेवन गर्ने विषयमा विवाद भइरहने, आफुलाई अपमानित गरेको अरुणले ब्यान दिएकाे उनले वताए ।
यसका साथै, पिस्तोलले हानी मारीदिन्छु भनेको कारणले निजलाई मार्ने मनसाय अनुसारनै चक्कुसहित साेमबार राती ९:३० बजेदेखि नै निज मृतककै घरमा निजसँगै बसेका अरुणले मंगलबार बिहान ४ बजे तिर चक्कु प्रहार गरी हत्या गरी भागी चपुरस्थित घरमा गई कपडा बदलिई पसलमा गई बसेकाे अवस्थामा पक्राउ गरिएकाे प्रहरी नायब उपरिक्षक मिश्राले जानकारी दिए ।
पक्राउ परेका अरुणमाथी कर्तव्य ज्यान सम्बन्धी मुद्दामा थप अनुसन्धान भइरहेको उनले जानकारी दिए ।
घटनाको सूचना प्राप्त हुने बितिकै इलाका प्रहरी कार्यालय निजगढबाट प्रहरी निरिक्षक र जिल्ला प्रहरी कार्यालय बाराबाट प्रहरी नायब उपरिक्षक मिश्रको कमाण्डमा अनुसन्धान टोली घटनास्थलमा पुगी अनुसन्धान प्रकृया अगाडी बढाइएको थियाे ।
