बीरगन्ज । बीरगन्ज महानगरपालिका मेयर विजय कुमार सरावगी आज राहत लिएर आफै छपकैया पुगेका छन् । सिल गरिएकाे वीरगंज महानगरपालिकाकाे वडा नं. २ छपकैयामा राहत स्वरुप खाद्यान्न सामग्री लिएर मेयर सरावगी आफै पुगेका हुन् ।
सिल भएका कारण घरमै थुनिएपछि खाद्य सामाग्रीको अभावमा भोकभाकै बस्नु परेको गुनासो बाहिर आएपछि मेयर सरावगीले तदारुकता देखाएका हुन् ।
१५ सय परिवारलाई पुग्ने गरी खाद्यान्न सामग्री मेयर साहेब आफै लिएर छपकैया पुग्नु भएकाे उनका राजनितिक सल्लाहकार मुकेश द्विवेदीले वताए । ती सामाग्री विपन्न वर्गलाई बाँड्नको लागि वडालाई जिम्मा लगाइएको द्विवेदीले जानकारी गराए ।
सिल गरिएको छपकैया क्षेत्रका विशेष गरी गरिब, निमुखा तथा श्रमजीवि परिवारलाई लागि सो खाद्य सामाग्रीको व्यवसथा गरिएको उनले बताए । प्रति परिवार १५ किलाे चामल, डेढ किलाे दाल, एक प्याकेट नुन र तेल राहत बाँडिने छ ।
अहिलेलाई १५०० परिवारलाई पुग्ने गरी खाद्य सामाग्री वडालाई दिएकाे मेयर सरावगीले वताए । उनले भने “आवश्यक परे अझै उपलब्ध गराउछौं । सबै व्यवस्था महानगरले गर्छ, भोकभाकै कोही बस्नु पर्दैन ।”
महानगरले राहत बाँड्नका लागि सबै सामाग्री कार्यवाहक वडा अध्यक्ष वकिय मियाँ अन्सारीलाई जिम्मा लगाएको छ । यता सो क्षेत्रमा कोभिड १९ को र्यापिट टेस्ट पनि शुरु गरिएको मेयर सरावगीले जानकारी गराए ।
