वीरगंज । प्रहरी प्रधान कार्यालय नक्सालले एसपी गंगा पन्तलाई जिल्ला प्रहरी कार्यालय पर्सामा पठाएको छ । पर्साका प्रहरी प्रमुख सोमेन्द्रसिंह राठौंरलाई महानगरीय प्रहरी परिसर काठमाडौंमा सरुवा गरेको छ। महानगरीय प्रहरी परिसर काठमाडौंका एसपी अशोक सिंहको पनि सरुवा भएको हो । बारामा एसपी कृष्ण पंगेनीलाई काज सरुवा गरिएको हो ।
एक महिनापछि रिक्त रहेको जिल्ला प्रहरी कार्यालय चितवनमा प्रहरी प्रमुख पठाएको छ । एसपी नान्तीराज गुरुङलाई जिल्ला प्रहरी प्रमुख बनाएर पठाएको हो । गत पुसको तेस्रो साता एसपी दानबहादुर मल्लले जिल्ला छोडेपछि राजनीतिक दबावमा प्रहरी प्रधान कार्यालयले नयाँ एसपी पठाउन सकेको थिएन ।
गत पुस ४ गते नै २४ जना एसपीको एकैचोटी सरुवा भएको थियो । चितवन प्रहरी प्रमुखमा मल्लको ठाउँमा एसपी गंगा पन्तलाई पठाउने निर्णय गरेको थियो । तर राजनीतिक कारणले गर्दा एसपी पन्तलाई चितवन पठाइएको थिएन । त्यसो त सरुवा भएको दुई सातासम्म पनि एसपी मल्लले जिल्ला नछोडेपछि १२ घण्टे अल्टिमेटम नै जारी गर्नुपर्यो।
