वीरगञ्ज । पर्साकाे ४ स्थानिय तहका ३ सय जना गर्भवति तथा सुत्केरी महिलालाई न्यानो कपडा वितरण गरिएकाे छ । एक्सनएड नेपालको सहयोगमा दिव्य युवा क्लबले संचालन गरेकाे स्थानीय अधिकार कार्यक्रम अन्तर्गत न्यानाे कपडा वितरण गरिएकाे हाे ।
पर्साकाे पटेर्वा सुगौली गाउँपालिका, पोखरीया नगरपालिकाको वडा नं. ७ र ८, पकाहा मैनपुर गाउँपालिका वडा नं. ३ पकहा र विन्दवासिनी गाउँपालिकाको वडा नं. ५ प्रसौनी भाठ्ठामा न्यानो कपडा वितरण गरिएको क्लबका कार्यकारी निर्देशक रामाकान्त पटेलले वताए ।
स्थानीय अधिकार कार्यक्रम संचालनमा रहेको स्थानका गर्भवति र सुत्केरी महिलालाई १ थान कम्बल सहित ‘विन्टराइजेसन किट’ (कम्बल, ज्याकेट, पछ्यौरा) प्रदान गरिएको निर्देशक पटेलले जानकारी गराए ।
पटेर्वासुगौलीमा १ सय ५८, पकाहामैनपुर-३ पकाहामा ४८ जना, विन्दबासिनी- ५ भेलाहा, बट्सौरामा ३९ जना, पोखरीया ७ दलितटोल र ८ मननपुरमा क्रमशः २१ र ३४ जनालाई न्यानो कपडा वितरण गरिएको क्लबले जनाएको छ ।
पहिला समुदाय स्तरमा गर्भवति र सुत्केरी महिलाको तथ्याङ्क संकलन गरेर स्थानीय पालिकाबाट स्वीकृति लिएर मात्रै न्यानो कपडा वितरण गरिएको स्थानीय अधिकार कार्यक्रम संयोजक कोपिला चौलागाईले जानकारी दिइन् ।
चिसाे र शितलहरबाट बाच्न सहयाेग पुग्ने उद्देश्यले क्लबले एक्सनएडकाे सहयाेगमा स्थानीय अधिकार कार्यक्रम अन्तर्गत न्यानाे कपडा वितरण गरेकाे हाे ।
