सर्लाही । जिल्ला प्रहरी कार्यालय सर्लाही अन्तर्गत रहेका प्रहरी चौकीबाट खटेका प्रहरी टोलीले अवैध लागु औषध सहित दुई जनालाई पक्राउ गरेको छ ।
पक्राउ पर्नेमा जिल्ला कास्की लेखनाथ पोखरा महानगरपालिका वडा नं. १ घर भई हाल तनहु जिल्ला सुखला गण्डकी नगरपालिका वडा नं. ३ बस्ने नुर्बु तामाँगको ३५ वर्षी छोरा पूर्ण बहादुर तामांग र तनहुँ जिल्ला सुखला गण्डकी नगरपालिका वडा नं. ७ बस्ने यम बहादुर आलेको ४३ वर्षीय छोरा यज्ञ चन्द्र आले रहेका छन् ।
निजकहरुले बा. १२ च ३५२७ नम्बरको कार चढी नेपाल भारत सीमा क्षेत्र अन्तर्गत भारतको इनर्वा गाउँको बाटो हुँदै नेपाली सीमा सर्लाही जिल्लाको पर्सा गाउँपालिका तर्फ आउँदै गरेको अवस्थामा पर्सा गाउँपालिका वडा नं. ५ स्थित शंकाको आधारमा प्रहरीले चेकजाँच गर्दा कारको पछाडि पट्टिको भागमा लुकाई छिपाई राखिएको अवस्थामा लागु औषध बरामद गरिएको थियो ।
पक्राउ परेका दुबै जनाको साथबाट प्रहरीले अवैध लागु औषध १ सय एम.एल.को फेन्साडाइल २ सय १० बोत्तल, ३ प्याकेटमा रहेको ९ सय पिस नाइट्रोभेट ट्याबलेट, मोबाइल ५ थान, हङकङको २४ डलर, ५० सेन्ट्स तथा नेपाली नगद रु. ३ लाख ६७ हजार बरामद गरिएको जिल्ला प्रहरी कार्यालय सर्लाहीका प्रहरी उपरीक्षक विश्वमणी पाखरेलले बताए ।
बरामद गरिएको लागुऔषध सहित पक्राउ परेका दुबै जनालाई जिल्ला प्रहरी कार्यालय सर्लाहीमा राखी आवश्यक अनुसन्धान प्रक्रिया अगाडि बढाइएको प्रहरी उपरीक्षक पोखरेलले बताए ।
यसरी नै सर्लाही प्रहरीले यही माघ ४ र ५ गते बरामद गरेको रक्सी, भन्सार छलिको कपडा तथा विभिन्न किराना सामानहरु सर्लाही स्थित भन्सार कार्यालयलाई बुझाएको छ ।
सर्लाही मलंगवा वडा नं. ६, ८ र ईश्वरपुर नगरपालिका वडा नं. १३ तथा धनकौल नगरपालिकाबाट अवैध रुपमा चोरी निकाशी हुन लागेको अन्दाजी मूल्य १ लाख ३० हजार बराबरको सोफी रक्सी, कपडा तथा विभिन्न किराना सामानहरु बरामद गरि सर्लाही स्थित भन्सार कार्यालयलाई बुझाइएको जिल्ला प्रहरी कार्यालय सर्लाहीले जनाएको छ ।
