वीरगंज । पर्साको कालिकामाई गाउँपालिका वडा नं. ५ सिमरा टोलमा एक युवकले आफ्नै श्रीमतीलाई घास काट्ने धारिलो हतियार (गडासी)ले प्रहार गरी हत्या गरेका छन ।
कालिकामाई गाउँपालिका वडा नं. ३ स्थाई घर भएका बर्ष ३५ का मुक्तिनारायण पटेलले ३१ बर्षकी आफ्नी श्रीमती संगिता देवी पटेललाई धारिलो हतियार प्रहार गरी हत्या गरेको इलाका प्रहरी कार्यालय पोखरियाका प्रहरी निरिक्षक चन्द्र सिंहले वताए ।
कालिकामाई गाउँपालिकाको वडा नं. ५ सिमरा टोल स्थित ससुरालीमा बस्दै आएका मुक्तिनारायणले ससुराली कै घरमा शुक्रबार अन्दाजी सांझ ५ः३० बजे श्रीमती संगिताको हत्या गरी फरार भएको उनले जानकारी गराए । घटना स्थल प्रहरी पुगी मुचुलका उठाउने काम गरि रहेको छ ।
घरायसी विवादका कारण हत्या गरेको प्रहरीको प्रारम्भीक अनुसन्धानबाट खुलेको छ । घटना बारे थप अनुसन्धान भइरहेको प्रहरी निरिक्षक सिंहले वताए ।
घटना स्थल नै रहेका वडाध्यक्ष पवन तिवारीले मृतक संगिताको घांटीको ३ ठाउँमा धारिलो हतियारले रेटेको जस्तो चिनोह देखिएको वताए । घटना बारे थप अनुसन्धान प्रहरीले गरिरहेको समेत उनले जानकारी गराए ।
