वीरगंंज, २३ चैत । आज आएको हावाहुरीसहितको असिना पानीका कारण बारा, पर्साका हुरीपीडितको झन् विचल्ली भएको छ ।
पानी, असिनाका कारण राहत वितरण प्रभावित भएको छ । पीडितहरु ओत लाग्ने ठाउँको खोजीमा भौतारिरहेका छन् ।
केही स्थानमा खेतमै टेन्ट हालिएकोले डुबानको समस्यासमेत उत्पन्न भएको स्थानीयले बताएका छन् ।
बर्षाका कारण जिल्ला विपद् व्यवस्थापन समितिको बैठकसमेत बस्न सकेको छैन ।
गत आइतबार राति आएको हावाहुरीका कारण २४ सय घरपरिवार प्रभावित भएको भए पनि अहिलेसम्म स्थानीय प्रशासन र विभिन्न संघ संस्थाको पहलमा झन्डै ६ सय टेन्ट मात्र पुगेको बताइएको छ ।
यस घटनामा बारा, पर्साका २९ जनाको मृत्यु, करिब ६ सय घाइते भएका छन् । २४ सय घर परिवार प्रभावित भएकोमा एक हजार घर पूर्णरुपमा भत्किएको रेडक्रसले जनाएको छ ।
