वीरगंज, १३ चैत ।
नेकपा (विप्लव) समुहका भोजपुरा प्रदेश प्रमुख वीरगञ्जबाट पक्राउ परेका छन् । वीरगञ्ज महानगरपालिका १९, वर्वाटोल घर भएका विगा प्रसाद चौरसियालाई प्रहरीले पक्राउ गरेको हो । सोमबार साँझ ९ बजे उनलाई वर्वा गाउँस्थित सडकबाटै नियन्त्रणमा लिएको जिल्ला प्रहरी कार्यालय पर्साले जनाएको छ ।
चौरसियाबिरुद्ध मुलुकी अपराध (संहिता) ऐन, २०७४ अन्तर्गत सार्वजनिक शान्ति विरुद्धको कसुरमा मुद्धा दर्ता गरि अनुसन्धान भइरहेको जिल्ला प्रहरी कार्यालय पर्साका प्रवक्ता प्रहरी नायब उपरीक्षक अनन्तराम शर्माले जानकारी दिए । ने.क.पा. (विप्लव) समुहका पर्सा इन्चार्ज समेत रहेका चौरसियालाई मंगलबार अदालत पेश गरि ७ दिनको म्याद समेत थप गरि अनुसन्धान भइरहेको प्रहरीले जनाएको छ ।
यसअघि प्रहरीले पर्साबाट पक्राउ गरेको विप्लव नेतृत्वको तीन जना नेता कार्यकर्ताहरु अहिले कारागारमा छन् । सरकारले ने.क.पा. (विप्लव) माथी प्रतिबन्ध लगाएका कारण पक्राउ गरिएको बुझिएको छ भने नेकपा (विप्लव) समुहका कार्यकर्ताहरुले विभिन्न संघ/संस्थाहरु तथा सर्व साधारणहरुबाट चन्दा माग गर्दै डर त्रास देखाई सार्वजनिक शान्ति भंग गर्दै हिडेको भन्नेको विशेष सुचनाको आधारमा नेता चौरसियालाई पक्राउ गरिएको उनलाई आज सार्वजनिक गर्दै पर्सा प्रहरीले जनाएको छ ।
