वीरगंज, २२ फागुन ।
वीरगंज महानगरपालिका स्थित आर्दशनगर रङ्गशालामा सञ्चालित ‘अश्वमेघ गायत्री महायज्ञ’ बुधवार विधिवरुपमा सम्पन्न भएको छ । फागुन १९ गते देखि संञ्चालीत आज चैथौ दिन अश्वमेघ गायत्री महायज्ञमा हजारौ श्रद्धालु भक्तजनले हबन गरेका थिए । महायज्ञमा २५१ यज्ञशाला निर्माण गरी भव्यरुपमा गायत्री पूजा सम्पन्न गरेका थिए । अखिल विश्व गायत्री परिवारको तत्वाधानमा शुरु भएको महायज्ञमा भारतको शान्तिकुञ्ज हरिद्वारबाट आएका पुरोहित तथा साधु संन्तले वैदिक मन्त्रका साथ हवन यज्ञादी गरेका थिए ।
महायज्ञमा हरेकदिन हबनयज्ञ, गोष्ठी, रथपरिक्रमा, दीपयज्ञ लगायतका धार्मिक अनुष्ठान भए संगै अश्वमेघ गायत्री महायज्ञले मधेसी पहाडी दलित गैरदलित महिला पुरुषबीचमा विभेद्लाई अन्त्य भएको छ । महायज्ञमा पूजाअर्चना गर्न दलित समुदायका मानिसको उल्लेखनीय सहभागिता रहेको तथा नेपाल लगायत भारतका विहार, उत्तरप्रदेश, उत्तराखण्ड, झारखण्ड, दिल्ली, हरियाण, महाराष्ट्र, मध्यप्रदेश, राजस्थान, गुजरातलगायत विदेश गरी ४० मुलुकका करीब तीन लाख श्रदालु आएको आयोजक समितिले जानकारी दिए ।
महायज्ञ समापन कार्यक्रममा प्रदेश नं २ का मुख्यमन्त्री लालबाबु राउत गद्दीले विश्व भौतिकवादमा डुबेको बेला अध्यात्मिक ज्ञान प्राप्त हुने यस्ता ठूला महायज्ञले विश्वमा अमनचयन तथा शान्ति ल्याउने विश्वास व्यक्त गर्नुभयो । अहिले युगमा एक देशले अर्को देशलाई, एक सम्प्रदायले अर्को सम्प्रदायलाई समाप्तपारी आफ्नो वर्चश्व कायम गर्न खोजेको अवस्थामा धर्म र संस्कृतिको माध्यमबाट अपनत्व खोज्नु उत्तम उपाय रहेको उहाँले बताउनु भयो ।
अश्वमेघ गायत्री महायज्ञ मूलसमारोह समितिका संयोजक डा उपेन्द्र महतोले सुख, शान्ति र समृद्धिका लागि महायज्ञ सफल भएको जानकारी दिनु भयो । अश्वमेघ गायत्री महायज्ञ आयोजक समितिका संयोजक तथा वीरगंज उपमहानगरपालिकाका मेयर विजयकुमार सरावगीको सभापतित्वमा कार्यक्रम सम्पन्न भएको थियो ।