वीरगंज, ४ पुस ।
वीरगंज भन्सार कार्यालयले लगाएको सिमामा पैदल हिंडनु पर्ने नियम विरोध पछि खारेज भएको छ । वीरगंज भन्सारमा आवतजावत गर्न सवारी साधनबाट उत्रि तोकिएको पैदल बाटो प्रयोग गर्ने नियम लागु भएको ४ घण्टा मै खारेज भएको हो ।
वीरगंज भन्सार कार्यालयले बुधबार नियम लगाए लगतै संघिय समाजवादी फोरमका वीरगंज नगर अध्यक्ष इशवर यादव नेतृत्वको समुह विरोधमा उत्रेको थियो । जनतालाई दुःख दिन हिसाबले सिमामा पैदल हिडनु पर्ने नियम लगाइएकोले आफुहरु विरोधमा उत्रेको संघिय समाजवादी फोरम नेपाल, पर्साका सदस्य तबरेज अहमदले वताए ।
भन्सारले स्थानीय सरकार, जनप्रतिनिधि र उद्योग वाणिज्य संघका प्रतिनिधि नराखी जनतालाई मारमा पार्ने गरि एकलौटी निर्णय गरेको भन्दै विरोध भएको हो । वीरगंज रक्सोल चल्ने रिक्सा, अटोरिक्सा लगायतका सवारी साधनमा तस्करी बढेकाले नियन्त्रणका लागि सो नियम बनाइएको वीरगञ्ज भन्सार कार्यालयका प्रमुख श्याम भण्डारीले बताए ।
सर्वसाधारणलाई कष्ट हुने भन्दै विरोध भएपछि सबै पक्षसँग छलफल गरेरमात्र नियम लागु गर्नेगरि तत्काल खारेज गरिएको उनले बताए ।
वीरगंज भन्सार कार्यालयले पुस ३ गते सुचना टांस गरी पुस ४ गते दखी भन्सार कार्यालयबाट आवतजावत गर्ने बृद्धबृद्धा, अशक्त्त र अपाङ्ग बाहेकका सम्पुर्ण यात्रुहरुले आफ्नो सवारी साधनबाट उत्रि तोकिएको पैदल बाटो प्रयोग गरिदिनुहुन अनुरोध गरेको थियो । सुचना समाजिक संजाल फेसबुकमा सार्वजनिक भए लगतै विरोध सुरु भएको थियो ।
