पर्सा, ३ पुस । पर्साको जगरनाथपुर गाउँपालिका–१ पाँडेपुरको सीमावर्ती नाकाबाट भारततर्फ इन्धन लगिरहेको समूहलाई प्रहरीले नियन्त्रणमा लिँदा झडप भएको छ ।
झडपमा एक प्रहरी सहायक निरीक्षक (असई) सहित चारजना प्रहरी घाइते भएका छन् । तस्कर र स्थानीयको कुटाईबाट पाँडेपुर चौकीका इन्चार्ज असई विष्णु देव यादव, प्रहरी हवल्दार प्रेम थापा, प्रहरी जवान अर्जुन चौधरी र पिडारीगुठीका असई जय किशुन महतो घाइते भएका छन् ।
झडपमा गम्भिर घाइते भएका प्रहरीको वीरगञ्जको एसएल न्यूरो एण्ड जनरल अस्पताल पानीटंकी र नारायणी उपक्षेत्रीय अस्पतालमा उपचार भइरहेको छ ।
झडपमा समान्य घाइते भएका प्रहरी सहायक निरीक्षक जय किशुन महतो स्थानीय स्वास्थ्य चौकी मै उपचार गराई फर्किएका छन् । टाउको फुटेर रगत जमेकाले प्रहरी जवान चौधरीको अवस्था सिकिस्त रहेको चिकित्सकले जनाएका छन् ।
मंगलबार बिहान करिब ३ बजेको समयमा मोटरसाइकलमा तेल बोकेर पाँडेपुर हुँदै भारतको इनर्वाको देवीगन्जतर्फ लगिरहेका तस्कर समूहलाई नाकामा पर्ने ओरिया खोलामा गस्ती गरिरहेका प्रहरीले रोकेका थिए ।
घटना लगत्तै जिल्ला प्रहरीका कार्यालय पर्साका प्रहरी उपरीक्षक ढकाल र प्रहरी नायब उपरीक्षक मानबहादुर राई घटनास्थल पुगेका थिए । खोजतलास गर्दा खोसिएको हतियार घटनास्थल नजिकै खेतमा फेला पारेको प्रहरी उपरीक्षक ढकालले बताए ।
