वीरगंज, २ पुस ।
नारायणी रंगशाला वीरगंजलाई प्रादेशिक तथा अन्तराष्ट्रिय रंगशाला बनाउनु पर्ने मांग गर्दै वीरगंजमा दोस्रो दिन पनी प्रदर्शन भएको छ । खेलाडी युवा, विद्यार्थी तथा समाजसेवी संजाल वीरगंजको आयोजनामा सोमबार वीरगंजमा प्रदर्शन गरिएको हो । वीरगंजको घण्टाघरबाट निस्केको विरोध जुलुश माईस्थान, माहविर स्थान, आदर्शनगर, गिता मन्दिर हुदै पुन माइस्थानमा आएर कोण सभामा परिणत भएको थियो ।
जुलुशमा सहभागिहरुले प्रदेश सरकार मुर्दाबाद, प्रदेश सरकारले असोज २५ गते गरेको निर्णय खारेज गर, नारायणी रंगशालालाई प्रादेशिक तथा अन्तराष्ट्रिय रंगशाला निर्माण गर लगायतका नारा समेत लगाएका थिए । कोण सभामा बोल्ने वक्ताहरुले वीरगंजमा रहेको नारायणी रंगशालालाई प्रादेशिक रंगशाला नबनाएर प्रदेश सरकारले जनकपुरमा रंगशाला बनाउने निर्णय गरेर वीरगंज संग विभेद गरेको वताए थिए ।
निजी जग्गा १८ विगहा क्षेत्रफलमा रहेको रंगशालालाई प्रादेशिक तथा अन्तराष्ट्रिय रंगशाला नबनाएर प्रदेश सरकारले जनकपुरमा भाडामा जग्गा लिएर आर्थिक भार थप्पेको समेत बोल्ने वक्ताहरुको भनाई थियो । जग्गा भाडा वापत खर्च हुने करोडौ रकम खेलाडीको क्षमता विकासमा खर्च गर्नु पर्ने वक्ताहरुको तर्क थियो । डि.पी.आर. समेत तयार भइसकेको नारायणी रंगशालाई प्रादेशिक रंगशाला बनाउनु पर्ने वक्ताहरुले जोडदार मांग समेत गरे ।
प्रदेश सरकारले निर्णय नसच्चियाए कडा भन्दा कडा आन्दोलन गर्ने वक्ताहरुले चेतावनी समेत दिए । कोण सभामा मध्यमाञ्चल खेलकुद विकास समितिका अध्यक्ष मानदेव हाजरा, विद्यार्थी नेता प्रभाकर गुप्ता, खेलाडी बिशेश्वर पटेल लगायतकाले मन्तव्य राखेका थिए । यस्तै आइतबार नेवि संघ, पर्साले पनि नारायणी रंगशालाई प्रादेशिक रंगशाला बनाउनु पर्ने मांग गर्दै वीरगंजको माइस्थानमा एक घण्टा चक्का जाम गरेको थियो ।
