वीरगंज, २८ मंसिर ।
प्रदेश नं. २ को प्रदेशिक रंगशाला जनकपुरमा बनाउने निर्णय नसच्चिए वीरगंजमा आन्दोलन हुने संकेत देखिएको छ । प्रदेश सरकारले प्रादेशिक रंगशाला जनकपुरमा बनाउने निर्णय सार्वजनिक भए देखी नै बिरोध सुरु भएको छ भने प्रदेश सरकारको निर्णय प्रति पर्सा र बाराको जनता आक्रोषित भएका छन ।
यता प्रदेश सरकारको आलोचना र विरोध बढे पछि जनकपुरमा रंगशाला बनाउने तयारी संघिय सरकारको रहेको भन्दै प्रदेश मुख्य मन्त्रीको कार्यालय पंछिन खोजेको छ । मुख्य मन्त्री तथा मन्त्री परिषदको कार्यालय प्रदेश नं. २ को लेटर पैडमा रंगशालाको बिषयमा भ्रामक समाचार आएको जनाएको जनाइएको छ । सचिव हरि प्रसाद फुयाल द्वारा हस्ताक्षरित पत्र मार्फत प्रादेशिक रंगशाला निर्माण गर्ने प्रदेश सरकारको कुनै योजना नरहेको र संघिय सरकारले रंगशाला बनाउन पक्रिया थालेको जनाइएको छ ।
यस अघि प्रदेश नं. २ को समाजिक बिकास मन्त्रालयले राष्ट्रिय खेलकुद परिषद काठमाण्डौलाई जनकपुर उपमहानगरपालिकाको वडा नं. १४ स्थित रहेको किता नं. १, १४, २८, ५०, ६९, ८१ र ८३ को जग्गामा प्रदेश मंन्त्रीपरिषदको मिति २०७५/०६/२५ को निर्णय अनुसार प्रादेशिक रंगशाला बनाउने सिफारिस समेत गरि सकेको छ ।
जनकपुरमा प्रादेशिक रंगला बनाउन राष्ट्रिय खेलकुद परिषदलाई समाजिक विकास मन्त्रालयले सिफारिस गरेको पत्र सार्वजनिक भए पछि थप प्रदेश सरकारको आलोचना हुदै छ ।
दशरथ रंगशाला पछिको मुलुक कै दोस्रो ठुलो रंगशाला वीरगंजमा रहेको नारायणी रंगशालालाई प्रादेशिक रंगशाला नबनाई जनकपुरमा प्रादेशिक रंगशाला बनाउने निर्णयले आक्रोश बढेको हो । यस बिषयमा बिहिबार वीरगंजमा राजनीतिक दलको सर्वपक्षिय बैठक नै बसको थियो ।
बैठकमा प्रदेश सरकारले निर्णय नसच्चिए आन्दोलन गर्ने र मुख्य मन्त्रीको वीरगंज प्रवेश निषेध गर्ने समेत कुरा चलेको थियो । मुलुक कै दोस्रो ठुलो रंगशाला वीरगंजमा रहेको नारायणी रंगशालालाई प्रादेशिक रंगशाला बनाउनु पर्ने सर्वपक्षिय बैठको निष्कर्ष छ । १८ विगहा क्षेत्रफलमा रहेको नारायणी रंगशालाको १५ हजार दर्शक क्षमता रहेको छ ।
बारा, पर्साको आक्रोष र विहिबार वीरगंजमा बसको सर्वपक्षिय बैठकको बारे प्रदेश सरकार सम्म पुगे पछि शुक्रबार रंगशाला कै बिषयमा प्रदेश सरकारको बैठक बसिरहेको बुझिएको छ । प्रादेशिक रंगशाला ६ अर्बको लागतमा बन्न लागेको बुझिएको छ भने वीरगंजमा रहेको नारायणी रंगशाला मर्मतको लागि एक करोड बजेट प्रदेश सरकारले विनयोजन गरेको छ ।
प्रदेश मन्त्रीपरिषदको बसेको बैठकले निर्णय नसच्चिए वीरगंजमा आन्दोलन गर्ने युवा नेताहरुले चेतावनी समेत दिएका छन । कुमु प्यालेस वीरगंजमा बसेको सर्वपक्षिय बैठकमा राजपा महासचिव राजेशमान सिंह, नेपाली कांग्रेस पर्सा सभापति अजय कुमार द्विवेदी, संघिय समाजवादी फोरम नेपालका केन्द्रिय सदस्य शशीकपुर मियाँ, पर्साका कार्यवाहक अध्यक्ष सुन्दर प्रसाद कुर्मी, युवा नेता ओमप्रकाश सरार्फ लगायतकाको उपस्थिती रहेको थियो । आन्दोलन गर्ने वीरगंज, दुःख पाउने वीरगंजियाहरु र हरेक दृष्टिकोणले फाइदा लिने पूर्वाहाहरु भनेर बैठकमा चक्रो विरोध समेत भएको थियो ।
