वीरगन्ज : एकीकृत जाँच चौकी (आईसीपी) सञ्चालन भएको ६ महिना नबित्दै यसको भौतिक संरचनामा अर्को कमजोरी भेटिएको छ। कालोपत्रे सडक ठाउँ–ठाउँमा भत्किएर जीर्ण बनेको छ । नेपाल इन्टर मोडल यातायात विकास समितिका आईसीपी प्रमुख हेमेन्द्रविक्रम शाहीले भारतीय कम्पनी केएस सफ्नेट्स सोलुसनको लापरवाहीका कारण कालोपत्रे उप्किएको बताए । समितिले आईसीपी सञ्चालनको जिम्मा पाएको छ । भारत सरकारले १ अर्ब ३९ करोड भारु लगानी गरी अलौ सिर्सियामा आईसीपी बनाइदिएको थियो ।
प्रवेशद्वारबाट वीरगन्ज–पोखरिया सडक जोड्ने १ हजार १ सय ५० मिटर चार लेन सडक केएस सफ्नेट्स सोलुसनले निर्माण गरेको थियो। आठ स्थानमा खाल्डाखुल्डी परी कालोपत्रे र गिट्टी यत्रतत्र थुप्रिएका छन्। यसका कारण ट्रक, ट्यांकरलगायत मालवाहक सवारी साधन सडकछेउ भएर गुड्ने गरेका छन् ।
भारतले गत चैत २४ गते भवन हस्तान्तरण गरेको थियो। साढे दुई महिना पनि नबित्दै मुख्य भवन र चारवटा गोदामका छत चर्किएर चुहिन थालेका थिए। निर्माण कम्पनीले गत असारमा छत मर्मत गरिदिएको थियो। एक वर्षसम्म मर्मतको जिम्मा निर्माण कम्पनीकै हुने उनले बताए। ‘त्यस बेला पटक–पटक आग्रह गरेपछि मात्र छत मर्मत भयो’, उनले भने, ‘अहिले एक महिनादेखि सडकको कालोपत्रे पनि ठाउँ–ठाउँमा उप्किएको छ। यसको मर्मत पनि उसले नै गर्छु भनेको छ ।
कम्पनीका परियोजना प्रबन्धक सुभाषचन्द्र दासले भने सडक निर्माणका बेला कुनै त्रुटि नगरिएको बताए। ‘सडकमै पार्किङ गरिएका मालवाहक सवारी साधनबाट डिजेल चुहिएर कालोपत्रे उप्किएको हो’, उनले भने, ‘ सडक मर्मत हामी छिट्टै गर्छौं । सभार अन्पूर्ण पोष्ट
