बीरगंज, १६ कार्तिक ।
प्रदेश २ का भौतिक पुर्वाधार तथा विकास मन्त्री जितेन्द्र सोनलले संघीय सरकारको सांगठनिक संरचना प्रति आपत्ति जनाउनु भएको छ । दुई जिल्लामा सेवा प्रवाह गर्न एक मात्र कार्यालयले संचालन गर्ने गरी बनाउने सांगठनिक संरचनाप्रति मन्त्री सोनलले आपत्ति जनाउनु भएको हो ।
जनकपुरमा बिहिबार यातायात पुर्वाधार निर्देशनालय र पुर्वाधार विकास कार्यालयको उद्घाटन गर्दै सोनलले हरेक जिल्लामा कार्यालय संचालन गर्नुपर्नेमा जोड दिनुभयो । मन्त्री सोनलले ‘धनुषामा कार्यालय संचालन गर्दा महोत्तरीको ग्रामिण भेगमा कुनै पनि हालतमा सहज सेवा प्रवाह गर्न नसकिने बताउदै प्रत्येक जिल्लामा कार्यालय संचालन गर्ने प्रदेश सरकारले निर्णय गरेको बताए ।
उहाँले संघीय सरकारले सेवासुविधाको नाममा मनोपोली गरेको आरोप लगाउदै ‘जे जे नीति नियम बनाउनु छ संघिय सरकारले बनाओस् तर संघीयता सफल पार्न आवश्यक पर्ने कानुन प्रदेश सरकारलाई बनाउन दिनु पर्ने कुरामा जोड दिनुभयो । मन्त्री सोनलले प्रदेश सरकारले संघीयता गुम्न नदिन आवश्यक कानुन बनाउने, कार्यालय खोल्ने र व्यवस्थापन गर्ने बताउदै संघीय सरकारको अकर्मण्यताका कारण अहिलेसम्म यातायात कार्यालय प्रदेश सरकारको मातहतमा नआएकोमा दु:ख व्यक्त गर्नु भएको थियो ।
कार्यक्रममा भौतिक पुर्वाधार बिकास मन्त्रालयका सचिव जीवछ मण्डल, प्रदेश सभासदस्य शारदा श्रेष्ठ, रामचन्द्र मण्डल, परमेश्वर साह , राम सरोज यादव लगायतले मन्तव्य व्यक्त गरेका थिए ।
