वीरगंज, २९ असोज/
राजद्रोहका मुद्दा खेपिरहेका सिके राउतका २८ जना समर्थकलाई अाइतबार वीरगंजबाट पक्राउ गरिएको छ ।
उच्च अदालत जनकपुरको अस्थायी इजलास वीरगंजमा पेशीको क्रममा दिउँसो १ बजे भएको प्रदर्शनमा समर्थकलाई पक्राउ गरी जिल्ला प्रहरी कर्याालयको हिरासतमा राखिएको पर्सा प्रहरीले जनाएको छ ।
पक्राउ पर्नेमा प्रदेश २ का पर्सा, बारा, रौतहट, महोत्तरी, धनुषा, सप्तरीलगायत जिल्लाका ४ महिला र २० पुरुष छन् । उनीहरूलाई सार्वजनिक मुद्दा अनुसार कारबाई हुने प्रहरीले जनाएको छ ।
यसैबीच रौतहटबाट असोज २१ गते पक्राउ परेका राउतको विषयमा बहस भएको छ । राउतलाई प्रहरीले रौतहट अदालत परिसरमा हाजिर भएको बेला पक्राउ गरी हिरासतमा राखी राज्यले देशद्रोहको मुद्दा चलाएको छ ।
राउतका अधिवक्ताहरूले कानूनविपरीत र मानव अधिकार उल्लङ्घन भएको भन्दै बन्दी प्रत्यक्षीकरण मुद्दा उच्च अदालतमा दायर गरेका छन् ।
जिल्ला प्रहरी कार्यालय रौतहट र नेपाल प्रहरीलाई विपक्षी बनाई हालिएको मुद्दाको सवालमा आज उच्च अदालत जनकपुरको अस्थायी इजलास वीरगंजको १ नं इजलासका प्रमुख न्यायाधीश डिल्लीराज अचार्यले राउत विरुद्ध चलेको मुद्दाको सकल फाइल तथा हालसम्मको नजीर र प्रमाण प्रतिलिपि पेश गर्नेगरी कात्तिक १ गते बिहान ११ बजेदेखि बहस हुने आदेश गरेको छ ।
राउतले मधेस गठबन्धन जिन्दाबाद, सबैलाई आजादी चाहियो, स्वतन्त्र मधेस र मधेस खाली गर भन्ने नारा लगाएको भिडियोको आधारमा देशद्रोहको मुद्दा दायर भएको प्रहरीले जनाएको छ ।
असोज २१ गते सिके राउतसँगै अन्य चारजना गरी कुल पाँचजना पक्राउ परेका थिए । राउतको तर्फबाट बहस गर्नेमा अधिवक्ता रामनारायण कुर्मी, वीरेन्द्रप्रसाद यादव र लालबाबू यादव रहेका थिए ।
