१३ असोज, काठमाडौं ।
भारतीय विदेशमन्त्री सुष्मा स्वराजले संयुक्त राष्ट्रसंघ महासभामा पाकिस्तानको चर्को आलोचना गरेकी छन् । साथै राष्ट्रसंघको भूमिकामाथि पनि प्रश्न उठाएकी छन् । महासभाको ७३ औं सत्रलाई सम्बोधन गर्दै भारतीय विदेशमन्त्री स्वराजले पाकिस्तानमाथि आतंकवादलाई बढाएको आरोप लगाएकी छन् ।
ओसामा विन लादेन मारिएपछि सबै तथ्य बाहिर आएपनि पाकिस्तानलाई कुनै ग्लानी नरहेको भन्दै उनले भनिन्, ‘९/११ का मास्टरमाइण्ड त मारिए तर, २६/११ का मास्टरमाइन्ड हाफिज सइद अहिले पनि पाकिस्तानमा चुनाव लडिरहेका छन् । भारतले कयौं पटक पाकिस्तानसँग कुरा गर्न खोजेको तर, एकपछि अर्को आक्रमण भएको उनले बताइन् ।
विदेशमन्त्री स्वराजले भनिन्, पाकिस्तान आतंकवादीहरुलाई स्वतन्त्र सेनानी भनिरहेको छ । जसले हामीमाथि आक्रमण गर्छ, उसलाई बहादुर घोषणा गरेर सम्मान गर्छ ।’ उनले राष्ट्रसंघको भूमिकामाथि प्रश्न उठाउँदै आतंकवादलाई परिभाषित गर्न आग्रह समेत गरेकी छन् । भारतीय विदेशमन्त्री स्वराजले भनिन्, ‘राष्ट्रसंघको गरिमा र उपयोगिता समयसँगै कम भइरहेको छ । राष्ट्रसंघमा सुधार आवश्यक छ ।’
