९ असोज, काठमाडौं । जनकपुरका कम्युनिस्ट नेता रामचन्द्र झा हाल नेकपाका केन्द्रीय सदस्य छन् । तर, उनले यसैसाता नगरकोटमा आयोजित एक कार्यक्रममा आफ्नै पार्टीका प्रधानमन्त्री केपी ओलीलाई प्रश्न गरे- ‘नेपालको भूमिमा सिँचाइ गर्नु राष्ट्रवाद हो कि पानीजहाज चलाउनु राष्ट्रवाद हो ? बालुवामा जहाज चल्छ ? यसको उत्तर मलाई दिनुहोला ।’
- Advertisement -
पूर्वमन्त्रीसमेत रहेका वामपन्थी नेता झाले मधेसमा सिके राउतले भ्रमको खेती गरिरहेको भन्दै त्यसको खण्डन गर्न नेकपाका नेताहरुले ध्यान नदिएको गुनासोसमेत गरे । नगरकोटमै अनलाइनखरसँगको विशेष अन्तरवार्तामा उनले भने-‘सिके राउतले भनिराखेको छ कि सेन बंश मधेसी थियो । यो हुँदै होइन । आफूखुशी व्याख्या गर्ने ? हामीले यस्तो भ्रामक कुराहरु सुनिरहेका छौं । तर, राज्य चलाउनेहरुले सिके राउतको भ्रामक कुराको खण्डन गरिराखेको म देख्दिनँ ।’
