वीरगंज । पर्सा संसदीय निर्वाचन क्षेत्र नं. १ अन्तर्गत विभिन्न मतदान केन्द्रमा बिहानैदेखि उत्साहजनक रूपमा मतदान भइरहेको छ। यस क्रममा मनिहारीस्थित मतदान केन्द्रमा पुगेर पूर्वमन्त्री प्रदिप यादवले आफ्नो मताधिकार प्रयोग गरेका छन्।

वीरगंज महानगरपालिका–२२ मनिहारीस्थित मतदान केन्द्रमा उनी बिहान करिब ८ बजे पुगेका थिए। मतदानपछि उनले निर्वाचन लोकतान्त्रिक प्रणालीको महत्वपूर्ण आधार भएको बताउँदै सबै मतदातालाई आफ्नो मताधिकार प्रयोग गर्न आग्रह गरेका छन्।

यसैगरी जनमत पार्टी पर्साका अध्यक्ष ओमप्रकाश सर्राफले पनि वीरगंज महानगरपालिका–१६ नगवास्थित मतदान केन्द्रमा पुगेर मतदान गरेका छन्।

मतदानपछि प्रतिक्रिया दिँदै सर्राफले लोकतान्त्रिक व्यवस्थामा मतदान प्रत्येक नागरिकको महत्वपूर्ण अधिकार मात्र नभई देशको भविष्य निर्धारण गर्ने प्रमुख माध्यम भएको बताए।

उनले भने, “प्रतिनिधिसभा सदस्यको निर्वाचन हाम्रो देशको शासन व्यवस्था, नीति निर्माण तथा समग्र विकाससँग प्रत्यक्ष रूपमा जोडिएको अत्यन्त महत्वपूर्ण प्रक्रिया भएकाले सोचविचार गरेर विवेकपूर्ण ढंगले मतदान गर्नु हामी सबै नागरिकको साझा जिम्मेवारी र कर्तव्य हो।”

पर्सा जिल्लाका विभिन्न मतदान केन्द्रमा सुरक्षाको कडा व्यवस्था गरिएको छ भने मतदाताहरू शान्तिपूर्ण रूपमा लाइनमा बसेर आफ्नो मताधिकार प्रयोग गरिरहेका छन्।

वीरगंज । पर्सा क्षेत्र नम्बर–४ अन्तर्गत छिपहरमाई गाउँपालिका वडा नम्बर–२ का तत्कालीन लोकतान्त्रिक समाजवादी पार्टी (लोसपा) तथा हाल जनता समाजवादी पार्टी नेपाल (जसपा नेपाल) मा आबद्ध दुई जना स्थानीय नेता नेपाली कांग्रेस मा प्रवेश गरेका छन्।

कांग्रेस उम्मेदवार रमेश रिजाल लाई समर्थन जनाउँदै इजहार मियाँ तेली र बिहारी महतो केवट सोमबार आयोजित कार्यक्रममा कांग्रेसमा प्रवेश गरेका हुन्। इजहार मियाँ तेली गत स्थानीय तह निर्वाचनमा लोसपाबाट वडाध्यक्षका प्रत्याशी समेत रहेका थिए।

टिहुकीमा सम्पन्न कार्यक्रममा उम्मेदवार रिजालले दुवै जनालाई अबीर टीका लगाएर पार्टीमा स्वागत गरेका थिए। सो अवसरमा उनले उनीहरूको प्रवेशले आफू थप उत्साहित बनेको उल्लेख गर्दै भने, “उहाँहरूको यो निर्णय केवल पार्टी परिवर्तन मात्र होइन, लोकतन्त्र, समावेशिता र विकासप्रतिको प्रतिबद्धताको अभिव्यक्ति हो।”

रिजालले नेपाली कांग्रेस सधैं विचार, सिद्धान्त र जनताको अधिकारको पक्षमा उभिँदै आएको दाबी गर्दै आगामी निर्वाचनमा व्यापक जनसमर्थन प्राप्त हुने विश्वास व्यक्त गरे।

स्थानीय तहमा प्रभाव राख्ने नेताहरूको कांग्रेस प्रवेशसँगै पर्सा–४ मा चुनावी समीकरण थप रोचक बन्दै गएको विश्लेषण गरिएको छ।

वीरगंज । पर्सा निर्वाचन क्षेत्र नम्बर–१ मा आगामी प्रतिनिधिसभा निर्वाचनलाई लक्षित गर्दै यतिबेला मतदाताबीच उम्मेदवारबारे तीव्र बहस चलिरहेको छ। यसै सन्दर्भमा प्रदीप यादव लाई धेरै मतदाताले “निर्विकल्प” उम्मेदवारका रूपमा अघि सारेका छन्।

नेपाल कम्युनिष्ट पार्टी (एमाले) का तर्फबाट उम्मेदवार बनेका यादवले विभिन्न वडाहरु तथा टोल–टोलमा निरन्तर घरदैलो, मतदाता भेटघाट तथा छलफल कार्यक्रमलाई तीव्रता दिएका छन्। घरदैलोका क्रममा स्थानीयवासीले पूर्व मन्त्री समेत रहेका यादवले विगतमा उठाएका विकासका मुद्दा, सडक पूर्वाधार विस्तार, खानेपानी व्यवस्थापन, शिक्षा तथा स्वास्थ्य क्षेत्रका पहललाई स्मरण गर्दै यसपटक स्पष्ट जनमत दिनुपर्ने धारणा व्यक्त गरेका छन्।

वीरगञ्जका एक मतदाताले भने, “हामीले धेरै अनुहार देख्यौं, तर काम गर्ने मान्छे चाहियो। पर्सा–१ लाई अगाडि बढाउन अब प्रदीप यादव नै सही विकल्प हुन्।”

पछिल्लो समय अन्य दलका उम्मेदवारहरूको सक्रियता बढेपनि मतदाताको ठूलो हिस्सा स्थिर नेतृत्व र निरन्तर पहल आवश्यक रहेको बताउँछन्। विशेषगरी युवावर्गले रोजगारी सिर्जना, उद्योग प्रवर्द्धन तथा सीमावर्ती क्षेत्रका समस्याको दीर्घकालीन समाधानलाई मुख्य एजेन्डा बनाउनुपर्ने माग अघि सारेका छन्। उनीहरूका अनुसार यादवले यी विषयमा स्पष्ट योजना सार्वजनिक गरेका छन्।

दुई पटक सांसद भइसकेका यादव पुनः उम्मेदवार बनेसँगै पर्सा–१ मा यसपटक प्रतिस्पर्धा कडा हुने संकेत देखिएको छ। तर मतदाताको मनोविज्ञान भने विकास र कामको मूल्याङ्कनतर्फ केन्द्रित हुँदै गएको स्थानीय विश्लेषकहरूको भनाइ छ। यसले यादवको व्यक्तिगत छवि र विगतको कार्यशैलीलाई निर्णायक तत्वका रूपमा स्थापित गर्न सक्ने देखिन्छ।

निर्वाचन मिति नजिकिँदै जाँदा घरदैलो, आमसभा तथा सामाजिक सञ्जालमार्फत प्रचारप्रसार तीव्र बन्दै गएको छ। तर पर्सा–१ का धेरै मतदाताको साझा भनाइ एउटै छ— “अब आश्वासन होइन, परिणाम चाहियो।” उनीहरूका अनुसार परिणाम दिन सक्ने उम्मेदवारका रूपमा प्रदीप यादव अगाडि देखिएका छन्।