वीरगंज । गौतम माध्यमिक विद्यालयले आफ्नो स्वर्ण जयन्तीको अवसरमा आयोजना गरेको अन्तरविद्यालय नेपाली वादविवाद प्रतियोगिता–२०८३ सम्पन्न भएको छ । प्रतियोगितामा १५ वटा विद्यालयका विद्यार्थीहरूको सहभागिता रहेको थियो ।
प्रत्येक विद्यालयबाट एक छात्रा र एक छात्र गरी दुई जना विद्यार्थी सहभागी भएको प्रतियोगितामा समसामयिक तथा सामाजिक विषयमा आधारित चारवटा शीर्षकमा पक्ष र विपक्षमा विद्यार्थीहरूले आफ्ना विचार, तर्क तथा प्रतितर्क प्रस्तुत गरेका थिए ।
प्रतियोगिताका विषयमा ‘कृत्रिम बुद्धिमत्ता (AI) विद्यार्थीका लागि अवसर हो कि चुनौती ?’, ‘पर्यावरण संरक्षणमा सरकारभन्दा नागरिकको भूमिका बढी महत्त्वपूर्ण’, ‘प्रकृतिमाथि विजय प्राप्त गर्ने मानवको सोच—विनाशको कारण कि सफलताको आधार ?’ तथा ‘प्रतिभा पलायन रोक्न राज्यको भूमिका बढी कि युवाको ?’ रहेका थिए ।
विद्यार्थीहरूको मूल्याङ्कन विषयवस्तुको प्रस्तुति, तार्किक क्षमता, वक्तृत्वकला, भाषा तथा उच्चारण, प्रतिवाद, खण्डन र समग्र प्रभावका आधारमा गरिएको थियो । प्रतियोगिताले विद्यार्थीहरूमा समसामयिक विषयप्रतिको बुझाइ, तार्किक सोच, आत्मविश्वास तथा प्रभावकारी रूपमा विचार प्रस्तुत गर्ने क्षमताको विकासमा योगदान पुर्याएको आयोजकले जनाएको छ ।
प्रतियोगितामा रॉयल एकेडेमीकी नलिक्षा प्रजापतिले प्रथम स्थान हासिल गरिन् । साउथजोन सेकेन्ड्री स्कूलकी सञ्जु कुमारी यादव द्वितीय, लिटिल फ्लावर स्कूलकी अनामिका यादव तृतीय, सेन्ट अल्फान्सोस् स्कूलकी आराध्या मलिक चौथो तथा पञ्चान्जंगा सेकेन्ड्री स्कूलकी युनिका कार्की पाँचौँ स्थानमा रहिन् ।
त्यस्तै, साउथजोन सेकेन्ड्री स्कूलका प्रिन्स अधिकारीलाई उत्कृष्ट प्रदर्शन गरेबापत ‘उत्कृष्ट वादविवादकर्ता’को उपाधिबाट सम्मान गरिएको थियो ।
प्रथमदेखि पाँचौँ स्थान हासिल गर्ने विद्यार्थी तथा उत्कृष्ट वादविवादकर्तालाई ट्रफी, मेडल, पुरस्कार तथा प्रमाणपत्र प्रदान गरिएकाे आयाेजक गाैतम स्कुलका साैराज प्रधानले जानकारी दिए ।
गौतम माध्यमिक विद्यालयका प्राचार्य गणेश छेत्रीको अध्यक्षतामा सम्पन्न कार्यक्रममा वीरगंज उद्योग वाणिज्य संघका पूर्वअध्यक्ष एवं साहित्यकार गणेश लाठ प्रमुख अतिथि थिए । प्रतियोगिताको निर्णायक मण्डलमा ठाकुर राम बहुमुखी क्याम्पसका प्राध्यापक राम पाण्डे, हरिखेतान बहुमुखी क्याम्पसकी प्राध्यापक रञ्जना घिमिरे तथा प्रेस सेन्टर नेपाल, मधेस प्रदेशका अध्यक्ष नीरज पिठाकोटी मगर रहेका थिए ।
