वीरगंज। पर्सा निर्वाचन क्षेत्र नम्बर–२ अन्तर्गत वीरगञ्ज महानगरपालिका वडा नम्बर २६, सुगौली टोलमा राष्ट्रिय स्वतन्त्र पार्टी (रास्वपा) का उम्मेदवार सुशील कुमार कानु को घरदैलो कार्यक्रम उत्साहपूर्ण रूपमा सम्पन्न भएको छ।

घरदैलोका क्रममा जेन–जी युवाहरू, ज्येष्ठ नागरिक, महिला तथा स्थानीय समर्थकहरूले उम्मेदवार कानुलाई अबिर र गम्छा लगाएर आत्मीय स्वागत गरेका थिए। कार्यक्रममा सहभागी स्थानीयवासीहरूसँग प्रत्यक्ष संवाद गर्दै कानुले कृषि, शिक्षा, स्वास्थ्य र पूर्वाधार विकासलाई आफ्नो प्रमुख प्राथमिकता रहेको बताए।

“जनताको आधारभूत आवश्यकतामा केन्द्रित कार्यक्रम ल्याउनेछु,” उनले भने, “स्थानीय तहदेखि संघीय तहसम्म समन्वय गर्दै योजनाबद्ध विकास अघि बढाइनेछ।” उनले कृषकका लागि मल व्यवस्थापनलाई प्रभावकारी बनाउने, युवाहरूलाई रोजगारीमुखी तालिम तथा सीप विकास कार्यक्रम सञ्चालन गर्ने प्रतिबद्धता पनि व्यक्त गरे।

उम्मेदवार कानुले रास्वपा नेतृत्वमा दलित समुदाय लक्षित स्वास्थ्य सुधार कार्यक्रम, शिक्षामा पहुँच विस्तार तथा स्थायी रोजगारीका अवसर सिर्जना गरिने विश्वास व्यक्त गरे। विकास, रोजगारी, शिक्षा र कृषिलाई केन्द्रमा राखेर जनताको आवश्यकता अनुसार काम गर्ने उनको भनाइ थियो।

कार्यक्रममा सहभागी समर्थकहरूले “परिवर्तनका लागि घण्टी ओठमा मात्र होइन, मनले छ समर्थन घण्टीमा—यो निर्वाचन हाम्रो हो, परिवर्तनको हो” भन्ने नारा लगाउँदै रास्वपाप्रति आफ्नो ऐक्यबद्धता जनाएका थिए।

सुगौली टोलमा देखिएको उल्लेख्य सहभागिता र उत्साहले पर्सा–२ मा चुनावी गतिविधि थप सक्रिय बन्दै गएको संकेत गरेको स्थानीयहरूको भनाइ छ। निर्वाचन नजिकिँदै जाँदा क्षेत्रको चुनावी माहोल अझ तातेको छ।

वीरगंज। निर्वाचनको दिन नजिकिँदै जाँदा वीरगन्जको राजनीतिक वृत्त झन् रोचक बन्दै गएको छ। यही क्रममा वीरगन्ज महानगरपालिका–८ का साजन महरा, ध्रुव महरा, राहुल महरा लगायत करिब २०० जना युवाहरू सामूहिक रूपमा राष्ट्रिय स्वतन्त्र पार्टी (रास्वपा) मा प्रवेश गरेका छन्।

गहवा क्षेत्रका ‘जेन्जी’ (Gen Z) पुस्ताका युवाहरूको यो संगठित प्रवेशलाई स्थानीय राजनीतिक वृत्तमा अर्थपूर्ण रूपमा हेरिएको छ। परम्परागत दलप्रति बढ्दो असन्तुष्टि र परिवर्तनको चाहना व्यक्त गर्दै युवाहरू नयाँ राजनीतिक विकल्पतर्फ आकर्षित भएको विश्लेषण गरिएको छ।

विशेषगरी प्रतिनिधिसभा सदस्यका उम्मेदवार हरि पन्त का लागि यो घटनालाई महत्वपूर्ण उपलब्धिका रूपमा लिइएको छ। संगठन विस्तार र चुनावी जोडघटाउको सन्दर्भमा ठूलो संख्यामा युवा शक्ति पार्टीमा आबद्ध हुनु उनको पक्षमा सकारात्मक संकेत मानिएको छ।

रास्वपाले अघि सारेका सुशासन, पारदर्शिता र युवामैत्री एजेन्डाले नयाँ पुस्तालाई आकर्षित गर्न सफल भएको देखिन्छ। हरि पन्तले स्थानीय तहमा निर्माण गरेको प्रभाव र निरन्तर जनसम्पर्क अभियानले पनि युवाहरूलाई एकीकृत गर्न भूमिका खेलेको बताइएको छ।

मधेस प्रदेशकै व्यापारिक तथा राजनीतिक केन्द्रका रूपमा परिचित वीरगन्जमा यसरी युवाहरूको समर्थन बढ्नु रास्वपाका लागि सांगठनिक दृष्टिले ठूलो उपलब्धि हो। यसले आगामी दिनमा स्थानीय मुद्दामा पार्टीको उपस्थिति र नेतृत्वदायी भूमिका अझ सशक्त बन्ने संकेत दिएको छ।

निर्वाचनको मिति नजिकिँदै जाँदा वीरगन्जमा राजनीतिक गतिविधि थप तीव्र हुने अपेक्षा गरिएको छ। युवा शक्तिको यो सक्रिय सहभागिताले यसपटकको चुनावी समीकरणमा नयाँ मोड ल्याउने आकलन गरिएको छ।

वीरगंज । पर्सा क्षेत्र नं. ४ को मसिहानीमा नेपाली कांग्रेसका निकट युवाहरूको भव्य भेला सम्पन्न भएको छ। भेलामा सहभागी युवाहरूले कांग्रेसका उम्मेदवार रमेश रिजाललाई जिताउन दृढ प्रतिवद्धता जनाएका छन् ।

उम्मेदवार रिजालले भेला समपर्ण गर्दै युवाको उत्साह, ऊर्जा र प्रतिबद्धताले आफूलाई निकै उत्साहित बनाएको बताएका छन्। उनले देश र क्षेत्रको समृद्धिका लागि नेतृत्व अब युवाको हातमा सुदृढ बनाउनु आवश्यक रहेको बताए ।

रिजालले भने, “हामीले रोजगारी सिर्जना, गुणस्तरीय शिक्षा, सहज स्वास्थ्य सेवा, कृषि आधुनिकीकरण र पूर्वाधार विकासलाई प्राथमिकतामा राखेर अघि बढ्ने प्रतिबद्धता व्यक्त गरेका छौँ। युवाशक्तिलाई उद्यम, सीप विकास र राजनीतिक नेतृत्वमा अगाडि ल्याउन विशेष योजना ल्याउने प्रतिबद्धता पनि दोहोर्याएको छु।”

भेलामा कांग्रेसका नेता सहरुम राउत गद्दी, राकेश यादव, नेवि संघ पर्साका अध्यक्ष रमेश यादव, क्षेत्रीय सचिव बलिष्ट अहमद, धर्मेन्द्र पटेल लगायतको उपस्थिती रहेको थियो।

यो भेला पर्सा–४ मा कांग्रेसका युवा नेतृत्वलाई सक्रिय बनाउने र आगामी निर्वाचनमा रमेश रिजालको विजय सुनिश्चित गर्ने एक महत्वपूर्ण कदमको रूपमा मूल्याङ्कन गरिएको छ।

वीरगंज । वीरगंज महानगरपालिका–११ श्रीपुरमा राष्ट्रिय स्वतन्त्र पार्टी (रास्वपा) को निर्वाचन परिचालन समिति अध्यक्ष त्रिनेत्र गिरिको अध्यक्षतामा सम्पन्न घरदैलो कार्यक्रमले क्षेत्र नम्बर–१ मा चुनावी माहोल थप तातेको छ। घरदैलो अभियानमा प्रतिनिधिसभा सदस्यका उम्मेदवार हरि पन्त स्वयं सहभागी भई मतदातासँग प्रत्यक्ष संवाद गरेका थिए।

श्रीपुर क्षेत्रमा आयोजित कार्यक्रमलाई स्थानीयबासीले उत्साहजनक रूपमा स्वागत गरेका थिए। घरदैलोका क्रममा उम्मेदवार पन्तले घर–घर पुगेर जनताका समस्या, अपेक्षा र सुझावहरू सुने। उनले शिक्षा, स्वास्थ्य, रोजगारी र सुशासनलाई आफ्नो मुख्य प्राथमिकता बनाउने प्रतिबद्धता दोहोर्‍याए। “राजनीति परिवर्तनका लागि हो, अवसरका लागि होइन,” भन्दै उनले पारदर्शिता र उत्तरदायित्वमा आधारित नेतृत्व आवश्यक रहेको उल्लेख गरे।

त्यसैगरी वीरगंज महानगरपालिका–१६ अन्तर्गत नगवा, इनर्वा र फुलवारी टोल लगायतका क्षेत्रमा पनि व्यापक घरदैलो कार्यक्रम सम्पन्न भएको छ। वार्ड नम्बर–१६ का बासी चन्दन पण्डितको अध्यक्षतामा सम्पन्न उक्त कार्यक्रममा स्थानीयवासीको उल्लेखनीय सहभागिता देखिएको थियो। टोल–टोलमा पुगेका पन्तलाई युवादेखि ज्येष्ठ नागरिकसम्मले साथ र समर्थन व्यक्त गरेका थिए।

घरदैलोका क्रममा स्थानीयले खानेपानी, सडक स्तरोन्नति, नाला व्यवस्थापन, युवाका लागि रोजगारी सिर्जना तथा सुशासनका विषयमा चासो व्यक्त गरेका थिए। पन्तले ती सबै विषयलाई आफ्नो कार्ययोजनामा समेट्ने आश्वासन दिँदै विगतका प्रतिनिधिहरूले पूरा गर्न नसकेका कामहरू परिणामसहित सम्पन्न गर्ने दाबी गरे।

रास्वपाको अभियानमा देखिएको जनसमर्थनले क्षेत्र नम्बर–१ मा प्रतिस्पर्धा थप रोचक बन्दै गएको संकेत दिएको छ। अभियानमा सहभागी कार्यकर्ताहरूका अनुसार हालसम्म विभिन्न टोलहरूमा पुगेको घरदैलो कार्यक्रममा जनताको सकारात्मक प्रतिक्रिया प्राप्त भइरहेको छ। विशेषगरी युवा पुस्ता परिवर्तनको पक्षमा उभिएको उनीहरूको भनाइ छ।

श्रीपुरदेखि नगवासम्म फैलिएको घरदैलो कार्यक्रममा महिलाहरूको पनि सक्रिय उपस्थिति देखिएको थियो। उनीहरूले सामाजिक सुरक्षा, शिक्षा र स्वास्थ्य सेवामा सुधारको अपेक्षा व्यक्त गरेका थिए। पन्तले महिलाको सशक्तीकरण र सहभागितालाई प्राथमिकतामा राख्ने प्रतिबद्धता जनाए।

चुनावी प्रचारप्रसार तीव्र बन्दै जाँदा हरि पन्तको घरदैलो अभियानले क्षेत्र नम्बर–१ मा रास्वपाको संगठनात्मक मजबुती र जनआधार विस्तार भएको संकेत गरेको छ। घरदैलो अभियानलाई निरन्तरता दिने तयारीमा रहेको रास्वपाले आगामी दिनमा थप सघन कार्यक्रमहरू गर्ने जनाएको छ। मतदातालाई सचेत निर्णय लिन आग्रह गर्दै पन्तले व्यवस्था सुधारका लागि परिवर्तन आवश्यक रहेको धारणा व्यक्त गरे।