वीरगंज । नेकपा एमाले वीरगंज महानगर कमिटीको आयोजनामा केन्द्रीय उपमहासचिव तथा युवा नेता योगेश भट्टराईको प्रमुख आतिथ्यमा पार्टी प्रवेश कार्यक्रम सम्पन्न भएको छ।

कार्यक्रममा ठाकुर राम बहुमुखी क्याम्पसका पूर्व सभापति तथा जसपा युवा नेता मुकेश द्विवेदी, वीरगंज महानगरपालिका वडा नं. ९ का पूर्व वडा अध्यक्ष मनोज कलवार तथा वडा नं. ३ का पूर्व वडा सदस्य एवं न्यायिक समितिका पूर्व सदस्य तुफैल अख्तरलगायतका नेताहरू नेकपा एमालेमा प्रवेश गरेका छन्।

नवप्रवेशी नेताहरूलाई केन्द्रीय उपमहासचिव योगेश भट्टराईले टीका र माला लगाएर पार्टीमा स्वागत गरेका थिए। आयोजकका अनुसार उक्त प्रवेश कार्यक्रमले पार्टी संगठनलाई थप मजबुत बनाउने र आगामी निर्वाचनमा एमाले एकजुट भएर अघि बढ्न सहयोग पुर्‍याउने विश्वास व्यक्त गरिएको छ।

कार्यक्रममा एमालेका केन्द्रीय सदस्य विजय कुमार सरावगी, पर्सा क्षेत्र नं. २ की प्रतिनिधिसभा सदस्य उम्मेदवार रिमा कुमारी यादव, बहुदरमाई नगरपालिकाका मेयर सिंगासान साह कलवारलगायत पार्टीका स्थानीय नेता, कार्यकर्ता तथा समर्थकहरूको उल्लेखनीय उपस्थिति रहेको थियो। उनीहरूको सक्रिय सहभागिताले कार्यक्रमलाई थप सफल बनाएको आयोजकले जनाएका छन्।

वीरगंज । पर्सा क्षेत्र नम्बर–१ अन्तर्गत वीरगंज महानगरपालिका वडा नम्बर–१२ श्रीपुरमा नेकपा एमालेका उम्मेदवार प्रदीप यादवको सम्पर्क कार्यालय स्थापना गरी सञ्चालनमा ल्याइएको छ। बिहीबार नेकपा एमालेका उपमहासचिव तथा पूर्वमन्त्री योगेश भट्टराईले उक्त सम्पर्क कार्यालयको औपचारिक उद्घाटन गरेका हुन्।

उद्घाटन कार्यक्रममा एमाले उपमहासचिव भट्टराईसँगै पर्सा–१ का प्रतिनिधिसभा सदस्य उम्मेदवार प्रदीप यादवको विशेष उपस्थिति रहेको थियो। कार्यक्रममा सम्बोधन गर्दै भट्टराईले फागुन २१ गतेको निर्वाचनपछि देशमा एमाले नेतृत्वकै सरकार बन्ने दाबी गर्दै सो सरकारमा प्रदीप यादवलाई महत्वपूर्ण मन्त्रालयको जिम्मेवारी दिइने स्पष्ट पारे। त्यसका लागि पर्सा–१ का मतदातालाई यादवलाई अत्यधिक मतका साथ जिताएर संसदमा पठाउन आग्रह गरे।

यादव कर्मठ, जनताको माझमा रहने र लोकप्रिय नेता भएको उल्लेख गर्दै भट्टराईले यस्ता नेतालाई प्रतिनिधिसभामा पठाउनु आवश्यक रहेको बताए। उनले यादवको नेतृत्व क्षमताको प्रशंसा गर्दै पर्सा–१ को विकासमा निर्णायक भूमिका खेल्न सक्ने नेता भएको दाबी गरे।

कार्यक्रममा बोल्दै एमाले उम्मेदवार प्रदीप यादवले संविधान संकटमा परेको अवस्थामा त्यसको रक्षा गर्नकै लागि आफूले एमाले रोजेको बताए। “संविधान नै नरहे मधेसका मुद्दा पनि रहँदैनन्,” भन्दै उनले संविधान र मधेसका मुद्दा जोगाउन एमालेसँगै अघि बढेको स्पष्ट पारे।

उपमहासचिव भट्टराईले आफ्नो वीरगंज आगमनसँगै एमाले पर्साभित्र रहेका केही तीतामिठा कुराहरू समाप्त भएको उल्लेख गर्दै आजको कार्यक्रमले पर्सामा एमाले एकताको सशक्त सन्देश दिएको बताए। उनले यसपटकको निर्वाचनमा पर्साका चारै क्षेत्र एमालेले जित्ने दाबीसमेत गरे।

“अहिलेको लडाइँ संविधान जोगाउने लडाइँ हो, राष्ट्र र राष्ट्रियता जोगाउने लडाइँ पनि हो। त्यसैले एमाले जित्नैपर्छ,” भट्टराईले भने।

एमाले पर्सा क्षेत्र नम्बर–१ का संयोजक मानदेव हजराको अध्यक्षतामा सम्पन्न उक्त कार्यक्रममा केन्द्रीय सदस्यहरू प्रभु हजरा र निर्मला देवकोटा, मधेस प्रदेशका पूर्वमन्त्री प्रमोद जयसवाल, प्रदेशसभा पूर्व सदस्य जन्नत अन्सारी, एमाले पर्सा जिल्ला अध्यक्ष डा. विश्वम्भर शर्मा, जिल्ला सचिव महेश दास, एमाले नेतृ मुन्नी श्रीवास्तव लगायतका नेताहरूको उल्लेखनीय सहभागिता रहेको थियो।

वीरगंज । पर्सा निर्वाचन क्षेत्र नम्बर–३ अन्तर्गत पटेरवा सुगौली गाउँपालिका वडा नम्बर–४ पथरइयाँमा देवरवाना काफला समितिका अगुवा व्यक्तित्वहरूलाई युवा प्रतिनिधिसभा सदस्य उम्मेदवार रूपेश कुमार पाण्डेले सम्मान गर्नुभएको छ।

सम्मान कार्यक्रमसँगै सम्पन्न भेलालाई सम्बोधन गर्दै उम्मेदवार पाण्डेले क्षेत्रका विद्यमान समस्या, जनताको दुःख–कष्ट तथा विकासका क्रममा देखिएका बाधा–अवरोधहरूको स्पष्ट चित्रण गर्नुभयो। उहाँले शिक्षा, स्वास्थ्य सेवा, रोजगारी, कृषि विकास, पूर्वाधार निर्माण तथा सुशासनलाई आफ्नो प्रमुख प्राथमिकतामा राख्ने प्रतिबद्धता व्यक्त गर्नुभयो।

“अब पर्सा–३ लाई भाषण होइन, प्रत्यक्ष परिणाम चाहिएको छ,” भन्दै उहाँले जनताको विश्वास र अपेक्षालाई कार्यान्वयनमार्फत पूरा गर्ने दृढ अठोट दोहोर्याउनुभयो।

कार्यक्रममा सहभागी स्थानीय नेता–कार्यकर्ता तथा सर्वसाधारण नागरिकहरूले उम्मेदवार पाण्डेप्रति खुला समर्थन व्यक्त गर्दै आगामी निर्वाचनमा सफलता प्राप्त गर्न शुभकामना दिएका थिए। उनीहरूले पाण्डेको उम्मेदवारीले पर्सा–३ मा विकास र परिवर्तनको नयाँ आशा जगाएको धारणा राखेका छन्।

आयोजकका अनुसार उक्त भेलाले पर्सा–३ मा रूपेश कुमार पाण्डेको उम्मेदवारी केवल आश्वासनमा सीमित नभई काम र परिणाममार्फत प्रमाणित हुने विश्वास थप बलियो बनाएको सन्देश दिएको छ।

साे अवसरमा पूर्व मन्त्री एवं प्रदेश सभा सदस्य प्रमाेद जयसवाल, पटेर्वा सुगाैली गाउँपालिकाका पूर्व अध्यक्ष हरिनारायण चाैधरी लगायतकाे उपस्थिती रहेकाे थियाे ।

वीरगंज । राजनीति उनको बाल्यकालको सपना थिएन, न त उनी कुनै ठूला राजनीतिक परिवारको पृष्ठभूमिबाट आएकी हुन् । तर समाजलाई नजिकबाट बुझ्दै जाने क्रममा उनी आज प्रतिनिधिसभा सदस्यको उम्मेदवार बनेर जनताको माझमा उभिएकी छन् । पर्सा निर्वाचन क्षेत्र नम्बर–२ बाट उम्मेदवार बनेकी २९ वर्षीया रिमा कुमारी यादव पुस्तान्तरण हुँदै गएको राजनीतिमा नयाँ सोच र फरक यात्राको परिचायक बनेकी छन्।

रिमा कुमारी यादव बुबा विश्वनाथ राउत अहिर र आमा सिकीली देवीकी छ सन्तानमध्ये दोस्रो सन्तान हुन्। साधारण पारिवारिक वातावरणमा हुर्किएकी उनले सानैदेखि शिक्षा र अनुशासनलाई प्राथमिकतामा राखिन् । प्राथमिक तहको अध्ययन काठमाडौंको हाँडेगाउँस्थित एकता सदन बोर्डिङ स्कुलबाट गरेकी उनले एसएलसी कलैयास्थित ज्ञानदीप सेकेण्डरी स्कुलबाट उत्तीर्ण गरिन्। त्यसपछि प्लस टु र स्नातक तहसम्मको अध्ययन हरिखेतान बहुमुखी क्याम्पसबाट पूरा गरिन्।

शिक्षा हासिल गरेपछि उनी गाउँकै विद्यालयमा अध्यापन पेशामा संलग्न भइन्। शिक्षकका रूपमा काम गर्ने क्रममा विद्यालयको भौतिक अवस्था, नीतिगत कमजोरी र विद्यार्थीका व्यावहारिक समस्यालाई उनले नजिकबाट बुझ्ने अवसर पाइन्। पढाइ बीचमै छोडेर रोजगारीमा जान बाध्य विद्यार्थी तथा सीमित स्रोतसाधनमै संघर्ष गरिरहेका शिक्षकहरूको अवस्था देख्दा शिक्षा सुधार भाषणमा सीमित हुन नहुने निष्कर्षमा उनी पुगिन्।

सन् २०१८ मा अधिवक्ता प्रधुमन प्रसाद यादवसँग विवाह गरेकी उनी एक छोरा र एक छोरीकी आमा हुन्। पारिवारिक जिम्मेवारीसँगै समाजप्रति उत्तरदायी भूमिकामा सक्रिय रहँदै आएकी यादव शिक्षा, कृषि तथा महिला सशक्तीकरणका विषयमा समेत निरन्तर सरोकार राख्दै आएकी छन्।

गाउँ–समाजमा महिलाहरू अझै पनि निर्णय प्रक्रियामा पुरुषमा निर्भर रहनुपर्ने अवस्था र आर्थिक अभावका कारण धेरै विद्यार्थीले आफ्नो भविष्य अधुरै छोड्नुपर्ने बाध्यता उनले आफ्नै आँखाले देखेकी छन्। यस्ता समस्याको समाधानका लागि राज्यको नीति र नेतृत्व दुवै जिम्मेवार हुनुपर्ने उनको धारणा छ। यही उद्देश्यले संसदसम्म जनताका आवाज पुर्‍याउने अठोटका साथ उनी राजनीतिमा होमिएकी हुन्।

राजनीतिमा नयाँ भएकै कारण पारिवारिक राजनीतिक पृष्ठभूमि नरहेको प्रश्न उठ्ने गरेको स्वीकार्दै उनी भन्छिन्, “राजनीति कसैले जन्मिँदै जानेको हुँदैन। देख्दै, सुन्दै र पढ्दै आएको अनुभवलाई अहिले प्रत्यक्ष अभ्यासमा उतार्ने अवसर पाएकी छु।” जनताका समस्या र गुनासो प्रत्यक्ष सुन्दा समाजको वास्तविक अवस्था अझ प्रस्ट देखिएको उनी बताउँछिन्।

विगतमा धेरै नेताहरूले आश्वासन मात्र बाँडेको भन्दै उनी असन्तुष्टि व्यक्त गर्छिन्। गर्न नसक्ने कामको वाचा गर्नु गलत भएको र बोलेपछि गरेर देखाउनुपर्नेमा उनको जोड छ। यही सोच र प्रतिबद्धतासहित रिमा कुमारी यादव आज पर्सा–२ का मतदातामाझ नयाँ विकल्पका रूपमा अघि बढिरहेकी छन्।