वीरगंज । राजनीति उनको बाल्यकालको सपना थिएन, न त उनी कुनै ठूला राजनीतिक परिवारको पृष्ठभूमिबाट आएकी हुन् । तर समाजलाई नजिकबाट बुझ्दै जाने क्रममा उनी आज प्रतिनिधिसभा सदस्यको उम्मेदवार बनेर जनताको माझमा उभिएकी छन् । पर्सा निर्वाचन क्षेत्र नम्बर–२ बाट उम्मेदवार बनेकी २९ वर्षीया रिमा कुमारी यादव पुस्तान्तरण हुँदै गएको राजनीतिमा नयाँ सोच र फरक यात्राको परिचायक बनेकी छन्।
रिमा कुमारी यादव बुबा विश्वनाथ राउत अहिर र आमा सिकीली देवीकी छ सन्तानमध्ये दोस्रो सन्तान हुन्। साधारण पारिवारिक वातावरणमा हुर्किएकी उनले सानैदेखि शिक्षा र अनुशासनलाई प्राथमिकतामा राखिन् । प्राथमिक तहको अध्ययन काठमाडौंको हाँडेगाउँस्थित एकता सदन बोर्डिङ स्कुलबाट गरेकी उनले एसएलसी कलैयास्थित ज्ञानदीप सेकेण्डरी स्कुलबाट उत्तीर्ण गरिन्। त्यसपछि प्लस टु र स्नातक तहसम्मको अध्ययन हरिखेतान बहुमुखी क्याम्पसबाट पूरा गरिन्।
शिक्षा हासिल गरेपछि उनी गाउँकै विद्यालयमा अध्यापन पेशामा संलग्न भइन्। शिक्षकका रूपमा काम गर्ने क्रममा विद्यालयको भौतिक अवस्था, नीतिगत कमजोरी र विद्यार्थीका व्यावहारिक समस्यालाई उनले नजिकबाट बुझ्ने अवसर पाइन्। पढाइ बीचमै छोडेर रोजगारीमा जान बाध्य विद्यार्थी तथा सीमित स्रोतसाधनमै संघर्ष गरिरहेका शिक्षकहरूको अवस्था देख्दा शिक्षा सुधार भाषणमा सीमित हुन नहुने निष्कर्षमा उनी पुगिन्।
सन् २०१८ मा अधिवक्ता प्रधुमन प्रसाद यादवसँग विवाह गरेकी उनी एक छोरा र एक छोरीकी आमा हुन्। पारिवारिक जिम्मेवारीसँगै समाजप्रति उत्तरदायी भूमिकामा सक्रिय रहँदै आएकी यादव शिक्षा, कृषि तथा महिला सशक्तीकरणका विषयमा समेत निरन्तर सरोकार राख्दै आएकी छन्।
गाउँ–समाजमा महिलाहरू अझै पनि निर्णय प्रक्रियामा पुरुषमा निर्भर रहनुपर्ने अवस्था र आर्थिक अभावका कारण धेरै विद्यार्थीले आफ्नो भविष्य अधुरै छोड्नुपर्ने बाध्यता उनले आफ्नै आँखाले देखेकी छन्। यस्ता समस्याको समाधानका लागि राज्यको नीति र नेतृत्व दुवै जिम्मेवार हुनुपर्ने उनको धारणा छ। यही उद्देश्यले संसदसम्म जनताका आवाज पुर्याउने अठोटका साथ उनी राजनीतिमा होमिएकी हुन्।
राजनीतिमा नयाँ भएकै कारण पारिवारिक राजनीतिक पृष्ठभूमि नरहेको प्रश्न उठ्ने गरेको स्वीकार्दै उनी भन्छिन्, “राजनीति कसैले जन्मिँदै जानेको हुँदैन। देख्दै, सुन्दै र पढ्दै आएको अनुभवलाई अहिले प्रत्यक्ष अभ्यासमा उतार्ने अवसर पाएकी छु।” जनताका समस्या र गुनासो प्रत्यक्ष सुन्दा समाजको वास्तविक अवस्था अझ प्रस्ट देखिएको उनी बताउँछिन्।
विगतमा धेरै नेताहरूले आश्वासन मात्र बाँडेको भन्दै उनी असन्तुष्टि व्यक्त गर्छिन्। गर्न नसक्ने कामको वाचा गर्नु गलत भएको र बोलेपछि गरेर देखाउनुपर्नेमा उनको जोड छ। यही सोच र प्रतिबद्धतासहित रिमा कुमारी यादव आज पर्सा–२ का मतदातामाझ नयाँ विकल्पका रूपमा अघि बढिरहेकी छन्।
