वीरगंज । वीरगंजमा उपचारका लागि आएका एक जेष्ठ नागरिकको कुटपिटबाट मृत्यु भएको छ। पर्साको कालिकामाई गाउँपालिका वडा नं. २ भेडिहारी निवासी ६५ वर्षीय केपी चन्द राउत बरईको कुटपिटबाट ज्यान गएको हो।
घटना वीरगंज महानगरपालिका वडा नं. १३ राधेमाईस्थित कर्बोला अगाडि मोटरसाइकल पार्किङको विषयलाई लिएर सुरु भएको थियो। बिहीबार राति मोटरसाइकल पार्क नगर्न आग्रह गरेपछि विवाद भएको र सोही विवाद शुक्रबार बिहान पुनः चर्किएर कुटपिटमा परिणत भएको बताइएको छ।
प्रहरीका अनुसार वीरगंज महानगरपालिका वडा नं. २३ प्रसौनी निवासी ३२ वर्षीय मुन्ना भन्ने अर्जुन यादवले जेष्ठ नागरिक बरईमाथि कुटपिट गरेका थिए । कुटपिटबाट गम्भीर घाइते भएका बरईलाई उपचारका लागि वीरगंजस्थित तराई अस्पताल लगिएको थियो । अस्पतालमा उपचारकै क्रममा शुक्रबार बिहान ७:४५ बजे चिकित्सकले उनलाई मृत घोषणा गरेका हुन्।
स्थानीयका अनुसार मृतक बरई उपचारका लागि राधेमाईस्थित आफ्नै घरमा आएका थिए । घर अगाडि मोटरसाइकल जबरजस्ती पार्क गर्न खोजेपछि विवाद बढेको जनाइएको छ।
पर्सा जिल्ला प्रहरी कार्यालयका प्रवक्ता प्रहरी नायब उपरीक्षक हरिबहादुर बस्नेतले पार्किङ विवादकै कारण धकेलाधकेलको अवस्था सिर्जना भएको र सो क्रममा बरई गम्भीर घाइते भएको जानकारी दिए ।
घटनामा संलग्न रहेको आरोपमा अर्जुन यादवलाई प्रहरीले नियन्त्रणमा लिएको छ । घटनासम्बन्धी थप अनुसन्धान तथा मृत्युको वास्तविक कारणबारे सूक्ष्म छानबिन भइरहेको पर्सा जिल्ला प्रहरी कार्यालयले जनाएको छ ।
यता पीडित परिवारले घटना बारे जानकारी गराउँदा समेत स्थानीय प्रहरी समयमै नपुगेको आरोप लगाउँदै त्यसकै कारण ज्यान गएको दाबी गरेका छन् ।
